NEET Exam Paper Leak: अभ्यासात ढ असलेल्या श्रीमंत घरच्या विद्यार्थ्यांना हेरायचा, डॉक्टर करण्याचं स्वप्न दाखवून लाखो रुपये उकळायचा, शुभम खैरनारची मोडस ऑपरेंडी?
NEET Exam Paper Leak: नीट पेपरफुटी प्रकरणातील संशयित आरोपी नाशिकचा शुभम खैरनार याच्या अटकेनंतर धक्कादायक खुलासे होत आहेत.
NEET Exam Paper Leak: देशभरातील तब्बल 22 लाख 29 हजार विद्यार्थ्यांचे भवितव्य टांगणीला लावणाऱ्या 'नीट' पेपरफुटी प्रकरणाचे (NEET Exam Paper Leak) धागेदोरे आता अधिक गडद आणि धक्कादायक वळणावर पोहोचले आहेत. या प्रकरणातील संशयित आरोपी नाशिकचा शुभम खैरनार (Shubham Khairnar) याला केंद्रीय अन्वेषण विभागाने (CBI) आणि नाशिक गुन्हे शाखेने नाट्यमयरीत्या अटक केल्यानंतर त्याच्या गुन्हेगारीची 'मोडस ऑपरेंडी' (काम करण्याची पद्धत) समोर आली आहे. पैशांच्या जोरावर आपल्या मुलांना डॉक्टर बनवू इच्छिणाऱ्या बड्या धेंडांना गाठून शुभम खैरनार लाखो रुपयांची डील करायचा, अशी माहिती सूत्रांकडून उघड झाली आहे.
NEET Exam Paper Leak: काय होती शुभम खैरनारची 'मोडस ऑपरेंडी'?
याबाबत मिळालेल्या माहितीनुसार, शुभम खैरनारचे मुख्य टार्गेट हे "अभ्यासात सुमार (ढ) मात्र आर्थिकदृष्ट्या अत्यंत श्रीमंत" असणारे विद्यार्थी असायचे. ज्या पालकांकडे अफाट पैसा आहे आणि ज्यांना आपल्या मुलांना कोणत्याही परिस्थितीत 'डॉक्टर' बनवायचे आहे, अशा बड्या धेंडांचा शोध शुभम घ्यायचा.
NEET Exam Paper Leak: कोचिंग क्लासेसच्या संचालकांची भूमिकाही संशयाच्या भोवऱ्यात
पालकांना परीक्षेआधीच मूळ प्रश्नपत्रिका देण्याचे आमिष दाखवून तो 15 ते 20 लाख रुपयांची डील करत होता. 1 मे रोजीच हा पेपर फुटला होता, असा संशय आहे. शुभमने हा पेपर 10 लाख रुपयांना विकत घेतला आणि पुढे तो श्रीमंत विद्यार्थ्यांना 15 लाख रुपयांना विकला. या व्यवहारानंतर ही प्रश्नपत्रिका इन्स्टाग्रामवर लीक झाली होती, अशी माहिती समोर आली आहे. या हायटेक रॅकेटमध्ये राज्यातील काही नामांकित कोचिंग क्लासेसच्या संचालकांची भूमिका देखील संशयाच्या भोवऱ्यात असून, अनेक मोठे चेहरे सीबीआयच्या रडारवर आहेत.
NEET Exam Paper Leak: ओळख लपवण्यासाठी केलं टक्कल; पोलिसांचा थरारक सापळा
दरम्यान, शुभम खैरनार हा मूळचा नांदगावचा रहिवासी असून तो नाशिकमध्ये बी.ए.एम.एस. (BAMS) च्या शेवटच्या वर्षात शिकत होता. राजस्थान सीबीआय आणि पोलिसांनी दिलेल्या गोपनीय माहितीच्या आधारे नाशिक गुन्हे शाखा युनिट 2 ने कारवाई केली. पोलिसांपासून वाचण्यासाठी शुभमने चक्क आपले संपूर्ण केस कापून टक्कल केले होते आणि कपडेही बदलले होते. तो देवदर्शनासाठी जात असताना पोलिसांनी रस्त्यातच सापळा रचला. नवीन 'लूक'मुळे सुरुवातीला तो ओळखू आला नाही, मात्र पोलीस अंमलदारांनी त्याला शिताफीने ओळखले आणि त्याला ताब्यात घेण्यात आले.
NEET Exam Paper Leak: कॉल डिटेल्स आणि सीसीटीव्ही फुटेजची तपासणी सुरू
शुभमच्या कार्यालयात आणि घरी नेमके कोण-कोण लोक भेटायला येत होते, याचा सुगावा लावण्यासाठी सीबीआय आता त्याच्या घर आणि कार्यालयाच्या परिसरातील सीसीटीव्ही (CCTV) फुटेजची सखोल तपासणी करत आहे. याशिवाय, गेल्या काही महिन्यांपासून शुभम खैरनार याच्याशी प्रत्यक्ष सोशल मीडिया आणि दूरध्वनीद्वारे सातत्याने किंवा संशयास्पदरित्या संपर्क साधणाऱ्या व्यक्तींचा तपास सुरू करण्यात आला आहे.
NEET Exam Paper Leak: 21 जून रोजी होणार 'नीट'ची पुनर्परीक्षा
3 मे रोजी झालेली नीट परीक्षा पेपरफुटीमुळे अखेर रद्द करण्यात आली आहे. नॅशनल टेस्टिंग एजन्सीने (NTA) आता या परीक्षेची नवीन तारीख जाहीर केली असून, 21 जून रोजी नीटची पुनर्परीक्षा (Re-Exam) घेतली जाणार आहे. पेपरफुटीमुळे लाखो प्रामाणिक विद्यार्थ्यांचे अतोनात नुकसान झाले असून शैक्षणिक वेळापत्रक कोलमडले आहे.
आणखी वाचा
महत्त्वाच्या बातम्या
