एक्स्प्लोर

NEET Exam Paper Leak: मोठी बातमी: नीट पेपरफुटी प्रकरणात सीबीआयची लातूरमध्ये मोठी कारवाई, खासगी क्लास चालकाच्या घरावर छापा

NEET Exam Paper Leak: नीट पेपरफुटी प्रकरणातील लातूर कनेक्शन समोर आल्यानंतर सीबीआयने तपासाची व्याप्ती वाढवल्याचे पाहायला मिळत आहे.

Written By : निशांत भद्रेश्वर, एबीपी माझा | Updated at : 15 May 2026 10:28 AM (IST)

NEET Exam Paper Leak

Source : ABP Majha

NEET Exam Paper Leak: देशभर खळबळ उडवून देणाऱ्या नीट पेपरफुटी (NEET Exam Paper Leak) प्रकरणाचे धागेदोरे पुन्हा एकदा लातूरमध्ये शोधले जात आहेत. सीबीआयच्या (CBI) पथकाने आज पहाटेच लातूर शहरातील सुतमील परिसरात एका खासगी ट्युशन चालकाच्या घरावर छापा टाकला असून, गेल्या अनेक तासांपासून तपासणी सुरू आहे. या कारवाईमुळे शिक्षण पंढरी मानल्या जाणाऱ्या लातूरमध्ये (Latur) पुन्हा एकदा खळबळ उडाली आहे.

NEET Exam Paper Leak: पहाटे 6 वाजल्यापासून कारवाई सुरू

याबाबत मिळालेल्या माहितीनुसार, सीबीआयचे पथक आज पहाटेच संबंधित ट्युशन चालकाच्या निवासस्थानी धडकले. सकाळी सहा वाजल्यापासून घराची आणि महत्त्वाच्या कागदपत्रांची कसून तपासणी केली जात आहे. यामध्ये संशयित ट्युशन चालकाचे मोबाईल फोन, संगणक हार्ड डिस्क आणि विद्यार्थ्यांशी संबंधित आर्थिक व्यवहारांच्या नोंदींची पडताळणी केली जात असल्याचे समजते.

NEET Exam Paper Leak: सेवानिवृत्त प्राध्यापक पी. व्ही. कुलकर्णी सीबीआयच्या ताब्यात

तर लातूरमधील सेवानिवृत्त प्राध्यापक पी. व्ही. कुलकर्णी यांना सीबीआयने ताब्यात घेतल्याची माहिती समोर आली आहे. दोन दिवसांपूर्वी लातूरमध्ये झालेल्या तपास आणि चौकशीनंतर ही कारवाई करण्यात आली. कुलकर्णी हे चार वर्षांपूर्वी सेवानिवृत्त झाले होते. NEET पेपर सेट करण्याच्या समितीत त्यांचा सहभाग असल्याची माहिती तपासातून समोर येत आहे. पुण्यात ब्युटी पार्लर चालवणाऱ्या मनीषा वाघमारेच्या संपर्कात ते असल्याचेही समोर आले असून, त्याच धाग्यांवरून सीबीआयचे पथक लातूरपर्यंत पोहोचले. त्यानंतर कुलकर्णी यांची सखोल चौकशी करण्यात आली. लातूरमधील कैलास नगर येथील कुलकर्णी यांच्या घराला सध्या कुलूप असून त्यांचे कुटुंब पुण्यात राहत असल्याची माहिती आहे. सीबीआयचे दुसरे पथक अद्याप लातूरमध्ये ठाण मांडून असून, पुढील धागेदोरे आणि संभाव्य संपर्कांची तपासणी सुरू आहे.

NEET Exam Paper Leak: देशभरात आतापर्यंत 7 आरोपींना अटक

नीट पेपरफुटी प्रकरणात सीबीआयने आतापर्यंत देशभरातून सात प्रमुख आरोपींना बेड्या ठोकल्या आहेत. यामध्ये नाशिकमधून शुभम खैरनार, अहिल्यानगरमधून धनंजय लोखंडे, पुण्यातील मनीषा वाघमारे, जयपूरमधून मांगीलाल बिवाल, विकास बिवाल, दिनेश बिवाल आणि गुरुग्राममधून यश यादव यांचा समावेश आहे. या आरोपींकडून मिळालेल्या माहितीच्या आधारे आता लातूरमधील संशयितांची चौकशी केली जात आहे. तसेच, धनंजय लोखंडे याचा मित्र ओंकार शिंगोटे याची देखील पोलिसांकडून चौकशी करण्यात आली आहे.

NEET UG 2026 Re-Exam Date: 21 जूनला होणार पुनर्परीक्षा

दरम्यान, 3 मे रोजी झालेली नीट परीक्षा पेपरफुटीमुळे रद्द करण्यात आली होती. नॅशनल टेस्टिंग एजन्सीने (NTA) आता या परीक्षेची नवीन तारीख जाहीर केली आहे. 21 जून रोजी नीटची पुनर्परीक्षा घेतली जाणार आहे. पेपरफुटीमुळे वर्षभर मेहनत करणाऱ्या विद्यार्थ्यांचे आणि पालकांचे मोठे नुकसान झाले असून, शैक्षणिक वेळापत्रकही कोलमडले आहे. मात्र, सीबीआयच्या या धडक कारवाईमुळे गुन्हेगारांचे धाबे दणाणले आहेत. आता लातूरमधील या छाप्यात नेमके काय निष्पन्न होते आणि आणखी कोणाची नावे समोर येतात, याकडे संपूर्ण राज्याचे लक्ष लागले आहे.

NEET Exam Paper Leak: नीटच्या विद्यार्थ्यांची नाराजी

नीटच्या पेपर फुटी प्रकरणानंतर आता या विद्यार्थ्यांना पुन्हा परीक्षा द्यावी लागणार आहे. परीक्षेची तारीख जाहीर झाल्यानंतर बीडमध्ये शिक्षक आणि विद्यार्थी पुन्हा एकत्र आले आहेत. या विद्यार्थ्यांसमोर पुढे नेमकं काय करायचं? याचा पेच निर्माण झालाय. यावरच शिक्षकांकडून विद्यार्थ्यांना मार्गदर्शन करण्यात आले. मात्र पुन्हा होणाऱ्या परीक्षेबाबत विद्यार्थ्यांसह शिक्षकांनी नाराजी व्यक्त केली. दोन ते तीन वर्ष अभ्यास करून चांगले मार्क्स मिळवले. मात्र, या पेपर फुटीमुळे आमची मेहनत वाया गेली, अशी नाराजी विद्यार्थ्यांनी व्यक्त केली. अचानक परीक्षा रद्द केल्यानं विद्यार्थ्यांवर आघात झाला. बीड सारख्या ग्रामीण भागातील अनेक विद्यार्थी परीक्षा झाल्यानंतर रूम सोडून गेले होते. परंतु आता या विद्यार्थ्यांना एक दोन महिन्यांसाठी कोण रूम देणार? असा सवाल शिक्षक विचारत आहेत. एवढ्या निगराणीखाली परीक्षा झाली असताना पेपर लीक कसा होतो? शासनाला हे माहीत कसं होत नाही? या मुलांचा दोष काय? असे प्रश्न बीडच्या शिक्षकांनी उपस्थित केले.