Nashik Crime News: शेअर मार्केट अन् प्लास्टिक कंपनीत भागीदारीचं आमिष दाखवलं, नाशिकमधील वकील, सरकारी नोकरदारांसह 40 जणांना कोट्यवधींचा गंडा; नेमकं काय घडलं?
Nashik Crime News: शेअर मार्केटमध्ये भरघोस परतावा आणि प्लास्टिक कंपनीत भागीदारीचे आमिष दाखवून नाशिकमधील 40 हून अधिक गुंतवणूकदारांना कोट्यवधी रुपयांचा गंडा घातल्याचा प्रकार उघडकीस आलाय.
Nashik Crime News: शेअर मार्केटमध्ये (Share Market) दरमहा 4 ते 6 टक्के इतका भरघोस परतावा देण्याचे आणि प्लास्टिक कंपनीत भागीदारीचे आमिष दाखवून नाशिकमधील वकील, सरकारी नोकरदार आणि अधिकाऱ्यांसह 40 हून अधिक गुंतवणूकदारांना कोट्यवधी रुपयांचा गंडा घालणाऱ्या जानवलकर कुटुंबाचा मोठा गैरव्यवहार उघडकीस आला आहे. गेल्या वर्षभरापासून पोलिसांना गुंगारा देणाऱ्या या टोळीतील युवराज आणि यश या दोन सख्ख्या भावांना नाशिक शहर गुन्हे शाखा युनिट-2 च्या पथकाने रायगड जिल्ह्यातून अत्यंत शिताफीने अटक केली आहे.
Nashik Crime News: बनावट फर्म स्थापन करून विणले जाळे
संशयित यश सुरेश जानवलकर, युवराज सुरेश जानवलकर, सुरेश बाबुराव जानवलकर आणि संगीता सुरेश जानवलकर या संपूर्ण कुटुंबाने नाशिकमध्ये आपले जाळे विणले होते. त्यांनी ‘फ्युचर स्टॉक मार्केट अनॅलिसिस’ नावाची एक बनावट इन्व्हेस्टमेंट फर्म सुरू केली होती. एप्रिल 2023 ते नोव्हेंबर 2025 या काळात त्यांनी अनेकांना जादा परताव्याचे आमिष दाखवून आपल्या जाळ्यात ओढले. केवळ शेअर मार्केटच नव्हे, तर सिन्नरच्या माळेगाव एमआयडीसी आणि अंबड येथील त्यांच्या प्लास्टिक बॉटल बनवण्याच्या कंपनीत भागीदारी देण्याचे आमिषही त्यांनी दाखवले. या आमिषाला बळी पडून समाजातील सुशिक्षित वर्ग, वकील व शासकीय कर्मचाऱ्यांनी लाखो रुपये गुंतवले. या प्रकरणातील एका मुख्य फिर्यादीचीच (Complainant) तब्बल 60 लाख रुपयांची फसवणूक झाल्याचे समोर आले आहे.
Nashik Crime News: राहते घरही 2 ते 3 लोकांना विकून संपूर्ण कुटुंब फरार
गुंतवणूकदारांनी आपले पैसे परत मिळवण्यासाठी पैशांचा तगादा लावताच, या भामट्या कुटुंबाने नाशिकमधील आपले राहते घर थेट 2 ते 3 वेगवेगळ्या ग्राहकांना साठेखत आणि खरेदीखत दस्तऐवज करून बेकायदेशीरपणे विकून टाकले. तिथून सर्व जमापुंजी गोळा करून संपूर्ण कुटुंबच नाशिक सोडून पसार झाले होते. याप्रकरणी नाशिकच्या अंबड पोलीस ठाण्यात (Ambad Police Station) आर्थिक फसवणुकीचा गुन्हा दाखल करण्यात आला होता.
Nashik Crime News: रायगड जिल्ह्यात गुन्हे शाखेची धडक कारवाई
नाशिकचे पोलीस आयुक्त संदीप कर्णिक, उपायुक्त चंद्रकांत गवळी यांच्या मार्गदर्शनाखाली आर्थिक गुन्हे शाखा व गुन्हे शाखा युनिट-2 चे पथक तांत्रिक विश्लेषणाच्या आधारे संशयितांचा माग काढत होते. हे संशयित आरोपी रायगड जिल्ह्यात लपून बसल्याची गुप्त माहिती मिळताच, पथकाने खालापूर, नेरळ आणि खोपोली परिसरातून युवराज सुरेश जानवलकर (वय 32) आणि यश सुरेश जानवलकर (वय 30) या दोन्ही भावांना वेगवेगळ्या ठिकाणाहून ताब्यात घेतले. पोलिसांनी केलेल्या कसून चौकशीत त्यांनी गुन्ह्याची कबुली दिली असून, न्यायालयाने त्यांना 3 दिवसांची पोलीस कोठडी सुनावली आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
