Nashik Crime : गतिमंद मुलीसोबत बापाचं राक्षसी कृत्य, नाशिकमध्ये बाप लेकीच्या नात्याला काळीमा फासणारी घटना
Nashik Crime News : नाशिकच्या शिंदे पळसे परिसरात एक संतापजनक घटना उघडकीस आली आहे. गतिमंद मुलीसोबत बापाने राक्षसी कृत्य केले असून या प्रकरणी गुन्हा करण्यात आला आहे.
नाशिक : जिल्ह्यात गेल्या काही दिवसांपासून मुलींवरील अत्याचाराच्या घटनांमध्ये वाढ होत आहे. खासगी क्लासच्या शिक्षकाकडून 10 वर्षीय मुलीचा विनयभंग केल्याची घटना ताजी असतानाच आता शिंदे पळसे (Shinde Palse) गावात एक संतापजनक घटना उघडकीस आली आहे. नराधम पित्याने आपल्याच गतिमंद मुलीस मारहाण करून तिच्यावर अत्याचार केल्याची घटना घडली आहे.
याबाबत अधिक माहिती अशी की, पीडिता ही अल्पवयीन व गतिमंद आहे. पित्याने तिला घरात नेत मारहाण केली तसेच तिच्यावर अत्याचार केला. हा प्रकार लक्षात आल्यानंतर पीडितेच्या आईने नाशिकरोड पोलिसांकडे (Nashik Road Police) तक्रार दाखल केली. त्यानुसार संशयिताविरोधात पोक्सो कायद्याअंतर्गत गुन्हा दाखल करण्यात आला आहे.
चिमुकलींवरील अत्याचाराच्या घटनांमध्ये वाढ
या घटनेने नाशिकमध्ये एकच खळबळ उडाली असून नातलगांकडूनच चिमुकलींवर होणाऱ्या अत्याचाराच्या घटनांमध्ये वाढ होत असल्याचे चित्र आहे. याआधीही जिल्ह्यात पित्याने चिमुकलीवर अत्याचार केल्याप्रकरणी गुन्हा दाखल आहे. त्यामुळे आता महिला आणि मुलींच्या सुरक्षेचा प्रश्न ऐरणीवर आल्याचे दिसून येत आहे.
खासगी क्लासच्या शिक्षकाकडून 10 वर्षीय मुलीचा विनयभंग
दरम्यान, काही दिवसांपूर्वी नाशिकच्या सिडको (Cidco) परिसरात खासगी क्लासेस घेणाऱ्या शिक्षकानेच (Teacher) 10 वर्षीय मुलीचा विनयभंग केल्याची घटना घडली होती. इयत्ता पाचवीमध्ये शिकणारी मुलगी क्लासरूममध्ये एकटी होती. तेव्हा संबंधित शिक्षकाने तिच्यासोबत गैरवर्तन केले. या प्रकारानंतर पीडित मुलगी क्लासवरून घरी आली. मात्र, दुसऱ्या दिवशी तिने क्लासला जाण्यास नकार दिला. यानंतर पीडितेच्या आईने तिला विश्वासात घेत तिच्याशी संवाद साधला असता पीडित मुलीने आईला आपबिती सांगितली. घटनेची माहिती मिळतच पीडितेच्या आईच्या पायाखालची जमीन सरकली. यानंतर कुटुंबीयांनी तातडीने पोलीस ठाण्यात धाव घेतली. या प्रकरणी नाशिकच्या अंबड पोलीस ठाण्यात विनयभंग आणि पोक्सोअंतर्गत गुन्हा दाखल करण्यात आला आहे. पालकांच्या तक्रारीनंतर संशयित शिक्षकाला अंबड पोलिसांनी अटक केली आहे.
इतर महत्त्वाच्या बातम्या
महत्त्वाच्या बातम्या
ट्रेंडिंग न्यूज
