Kalyan Hospital Receptionist Case VIDEO: कल्याण रिसेप्शनिस्ट मारहाण प्रकरणात ट्विस्ट; नवीन अँगल समोर, आधी नेमकं काय घडलेलं?
Kalyan Hospital Receptionist Case: कल्याण पूर्वमधील नांदिवली परिसरातल्या एका खासगी रुग्णालयात काम करणाऱ्या रिसेप्शनिस्ट तरुणीला बेदम मारहाण केल्याचा व्हिडीओ समोर आला होता
Kalyan Hospital Receptionist Case: कल्याण पूर्वमधील नांदिवली परिसरातल्या एका खासगी रुग्णालयात काम करणाऱ्या रिसेप्शनिस्ट तरुणीला बेदम मारहाण (Kalyan Hospital Receptionist Case) केल्याचा व्हिडीओ समोर आला होता. या व्हिडीओमध्ये गोपाळ झा नावाचा व्यक्ती एका मराठी तरुणीला लाथा-बुक्क्यांनी मारहाण करत असल्याचे समोर आले होते. याप्रकरणी गोकुळ झा याच्यासह त्याचा मोठा भाऊ रंजीत झा याला पोलिसांनी अटक करुन आज न्यायालयात हजर केलं होतं. न्यायालयाने दोघांना दोन दिवसांची पोलीस कोठडी सुनावली आहे. मात्र आता या प्रकरणाचा दुसरा व्हिडीओ समोर आला असून सदर रिसेप्शनिस्ट तरुणीने झा कुटुंबातील एका महिलेला कानाखाली मारल्याचं सीसीटीव्हीमध्ये कैद झालं आहे. त्यामुळे या प्रकरणात ट्विस्ट आल्याचं पाहायला मिळत आहे.
नवीन व्हिडीओमध्ये नेमकं काय घडलेलं?
सदर प्रकरणातील नवीन व्हिडीओमध्ये गोकुळ झा, रंजीत झा त्यांची आई आणि सून उभे असल्याचे दिसत आहे. या व्हिडीओमध्ये रिसेप्शनिस्ट तरुणी आणि गोकुळ झा यांच्यात शाब्दिक वाद झाल्याचं पाहायला मिळत आहे. यामध्ये गोकुळ झाने तरुणीला पहिले लाथ मारण्याचा प्रयत्न केला. तसेच शिवीगाळही केली. यानंतर गोकुळ झाला शांत करत त्याच्या आईने रुग्णालयाच्या बाहेर पाठवले. यानंतर रिसेप्शनिस्ट तरुणीने झा कुटुंबातील एका महिलेला कानाखाली मारलं. त्यानंतर गोकुळ झा बाहेरुन धावत आला आणि रिसेप्शनिस्ट तरुणीला जबर मारहाण केली.
गोकुळ झाच्या आईने सगळं सांगितलं-
सदर घटनेवर गोकुळ आणि रंजीत झा यांची आई म्हणाली की, सदर घटना माझ्या डोळ्यादेख घडली असून रिसेप्शनिस्ट तरुणीनेच आधी माझ्या सूनेवर हात उचलला. मुलीने माझ्या सुनेला शिवीगाळ केली होती. त्यानंतर तरुणीने माझ्या सूनेच्या कानाखाली मारली. हा सर्वप्रकार गोकुळ झाने पाहिले आणि बाहेरुन धावत येत त्याने तिला लाथ मारली. मात्र त्याने मारहाण करणे योग्य नव्हते, असा स्पष्ट निर्वाळाही आईने दिला आहे. त्याचबरोबर, सीसीटीव्ही फुटेज कट करून दाखवले जात असल्याचा गंभीर आरोपही गोकुळच्या आईने केला आहे.
गोकुळ झा रेकॉर्ड वरचा गुन्हेगार-
गोकुळ झा हा रेकॉर्ड वरचा गुन्हेगार आहे. याच्यावर कल्याण कोळशेवाडी उल्हासनगर या परिसरात दरोड्यासह मारहाणीचे गुन्हे दाखल आहेत. कल्याण पूर्व येथील नांदिवली परिसरामध्ये फेरीवाल्याकडून गोकुळ झा हप्ते वसुली करत असल्याचा आरोप शिवसेना शिंदे गटाचे शहर प्रमुख निलेश शिंदे यांनी केला आहे. त्यामुळे पोलीस उपायुक्त अतुल झेंडे यांनी दिलेल्या माहितीनुसार वेगवेगळ्या पद्धतीने त्याची चौकशी करून त्याला कठोर शिक्षा कशी होईल यासाठी पोलिसांचा प्रयत्न असणार आहे.
तरुणीवर सध्या रुग्णालयात उपचार सुरु-
सदर मराठी तरुणीवर सध्या रुग्णालयात उपचार सुरु आहेत. याबाबत जानकी रुग्णालयाचे डॉक्टर मोईन शेख यांनी म्हटलं की, तिच्या मानेवर मारहाण करण्यात आली आहे. तिच्या पायावर आणि छातीवर मारल्याचे वळ आहेत. आम्ही तात्काळ उपचार सुरु केले आहेत. तसेच तरुणीला मान हलवताना खूप वेदाना होत आहे. त्यामुळे या मारहाणीमुळे तिला पॅरालिसीस होण्याची शक्यता आहे. तरुणीला सध्या देखरेखीखाली ठेवण्यात आले आहे.
रिसेप्शनिस्ट मारहाण प्रकरणात मोठा ट्विस्ट, Video:
संबंधित बातमी:
महत्त्वाच्या बातम्या
