धक्कादायक! भर रस्त्यावर उभं राहून तरुणानं केलं भयंकर कृत्य; अंगावर शहारे आणणारा व्हिडीओ व्हायरल

Aurangabad Crime: औरंगाबादमध्ये भर रस्त्यात एका तरुणाने स्वत:वरच वार करुन घेऊन आत्महत्या करण्याचा प्रयत्न केला असल्याची घटना घडली आहे.

प्रातिनिधीक छायाचित्र

Aurangabad Crime News: औरंगाबादमध्ये ( Aurangabad)  एका तरुणाचा आत्महत्या करण्याचा प्रयत्न करणारा व्हिडीओ (Video) समोर आला आहे. भर रस्त्यावर उभा राहून स्वतःचा गळा चिरून घेतानाचा या तरुणाचा व्हिडीओ सोशल मीडियावर व्हायरल झाला आहे. औरंगाबाद-अहमदनगर रोडवरील ए.एस.क्लब जवळील ही घटना असून, तरुणावर रुग्णालयात उपचार सुरू आहेत. 

सोमवारी दुपारनंतर औरंगाबाद जिल्ह्यातील सोशल मीडियावर एक 'लाईव्ह सुसाईड'चा व्हिडीओ (Live Suicide Video) व्हायरल होत आहे . ज्यात एक 35 वर्षीय तरुण आपल्या हातात असलेल्या ब्लेडने स्वतःच्या अंगावर वार करतोय. विशेष म्हणजे पोटावर आणि गळ्यावर तो हातातल्या ब्लेडने एका मागून एक वार करताना पाहायला मिळतोय. भर रस्त्यावर तो अशाप्रकारचं कृत्य करत असल्याने वाहनधारकांचे लक्ष देखील त्याच्याकडे गेले. मात्र त्याला थांबवण्यासाठी कुणीच मधी पडलं नाही. काही वेळात रक्तस्त्राव झाल्याने हा तरुण जमिनीवर कोसळला.

घटनास्थळी पोलिसांची धाव...

औरंगाबाद अहमदनगर रोडवरील एएस क्लबजवळ मुख्य रस्त्यावर एक तरुण स्वतःवर ब्लेडने वार करत असल्याची माहिती शहर पोलिसांना मिळाली होती. त्यामुळे घटनेचे गांभीर्य लक्षात घेत पोलीस तात्काळ घटनास्थळी दाखल झाले. जखमी तरुणाला त्वरित औरंगाबादच्या शासकीय घाटी रुग्णालयात दाखल करण्यात आले. तर सध्या त्याच्यावर उपचार सुरू आहे. पोलिसांनी दिलेल्या प्राथमिक माहितीनुसार, राम बदालिया असे तरुणाचे नाव असून, हा युवक हिंदी भाषिक असल्याचे तेथील नागरिकांनी सांगितले. परंतु त्याने आत्महत्येचा प्रयत्न का केला हे अद्याप समजू शकले नाही.

अंगावर शहारे आणणारा व्हिडीओ....

स्वतःच्या अंगावर जखमा करून घेतानाचा या तरुणाचा व्हिडीओ सोशल मीडियावर व्हायरल झाला आहे. अंगात पिवळा टी शर्ट घातलेला हा तरुण गळ्यापासून तर पोटापर्यंत स्वतःच्या हातानेच ब्लेडने वार करत होता. त्याच्या अंगावर एवढ्या जखमा झाल्या होत्या की, संपूर्ण टी-शर्ट रक्ताने लाल भडक झाला होता. रक्ताच्या धारा थेट पायापर्यंत पोहोचल्याने पॅन्ट देखील लाल झाली होती. अंगावर शहारे आणणारा त्याचा हा व्हिडीओ सोशल मीडियावर व्हायरल होतोय. मात्र या तरुणाने एवढ्या टोकाचा पाऊल का उचललं याची माहिती खुद्द आता या तरुणांकडूनच मिळू शकते. त्यामुळे शुद्धीवर आल्यावर पोलीस त्याचा जवाब नोंदवण्याची शक्यता आहे.