Akola Crime : अकोल्यात एमडी ड्रग्स तस्करी उघड! BAMS च्या विद्यार्थ्यासह दोनजण अटकेत, एकजण फरार
Akola Crime News : एमडी ड्रग्ससारखे जीवघेणे अमली पदार्थ आता लहान शहरांमध्येही मुळं रोवू लागलेत. त्याची व्याप्ती शाळा, महाविद्यालयांपर्यंत पोहोचल्याचं दिसून येतंय.
अकोला : गौरक्षण रोड परिसरात खदान पोलिसांनी मोठी कारवाई करत एमडी ड्रग्स तस्करी प्रकरणाचा पर्दाफाश केला आहे. यामध्ये दोन आरोपींना अटक करण्यात आली असून, त्यांच्याकडून तब्बल 2 लाख 30 हजार रुपयांचं एमडी ड्रग्स (46.30 ग्रॅम) जप्त करण्यात आलं आहे. विशेष म्हणजे, अटकेत असलेल्या आरोपींपैकी एक बीएएमएस दुसऱ्या वर्षाचा विद्यार्थी आहे, तर या प्रकरणातील फरार आरोपी ‘गब्बर जमादार’ वंचित बहुजन आघाडीचा कार्यकर्ता आणि पोलीस मित्र असल्याचं पोलीस तपासात समोर आलं आहे. या धक्कादायक खुलास्यामुळे संपूर्ण अकोला जिल्ह्यात खळबळ माजली आहे.
घटना नेमकी कशी उघडकीस आली?
खदान पोलीस स्टेशन हद्दीतील आदर्श कॉलनी परिसरात दुचाकीवरून दोन जण एमडी ड्रग्स विक्रीसाठी येणार असल्याची माहिती पोलिसांना मिळाली. त्यानुसार पोलिसांनी गौरक्षण रस्त्यावर सापळा रचला.
संशयित दुचाकीस्वारांना थांबवून विचारणा केली असता त्यांनी उडवाउडवीची उत्तरे दिली. यानंतर त्यांच्या अंगझडतीदरम्यान त्यांच्याकडे एमडी ड्रग्सचा साठा आढळून आला. त्याचं एकूण वजन 46 ग्रॅम 30 मिली ग्रॅम असून, बाजारभावानुसार याची किंमत अंदाजे 2 लाख 30 हजार रुपये इतकी आहे.
अटक झालेल्या आरोपींची पार्श्वभूमी काय आहे?
मोहम्मद यासीन मोहम्मद आसिफ (वय 23)
मूळ रहिवासी: पंचगव्हाण, ता. तेल्हारा, जि. अकोला
सध्या: फिरदोस कॉलनी, गवळीपुरा, अकोला
शैक्षणिक माहिती: बीएएमएस दुसऱ्या वर्षाचा विद्यार्थी
मुस्ताक खान हादीक खान (वय 47)
रहिवासी: गफुरवाला प्लॉट, अकोला
हे दोघेही अकोल्यात अमली पदार्थ विक्रीसाठी आले असल्याची कबुली पोलिसांना दिली आहे. त्यांच्याकडून दोन मोटारसायकलीही जप्त करण्यात आल्या आहेत.
फरार आरोपी कोण?
या प्रकरणातील तिसरा संशयित ‘गब्बर जमादार’ हा सध्या फरार आहे. तपासात समोर आलेल्या माहितीनुसार, तो वंचित बहुजन आघाडीचा सक्रिय कार्यकर्ता आहे. ‘पोलीस मित्र’ म्हणूनही त्याची नियुक्ती होती. अनेक मोठ्या पोलीस अधिकाऱ्यांसोबत त्याचे फोटो आहेत.
या राजकीय आणि पोलीस यंत्रणेशी जोडलेल्या ओळखीमुळे तपासाची व्याप्ती वाढणार असल्याचे संकेत पोलिसांनी दिले आहेत. त्याच्या अटकेसाठी विशेष पथक तयार करण्यात आले आहे.
पोलिसांनी नेमकी काय कारवाई केली?
ही कारवाई पोलीस अधीक्षक अर्चित चांडक आणि उपविभागीय पोलीस अधिकारी सतिश कुलकर्णी यांच्या मार्गदर्शनाखाली करण्यात आली. कारवाईत सहभागी अधिकारी आणि अंमलदार:
पोलीस निरीक्षक मनोज केदारे
उपनिरीक्षक योगेंद्र मोरे
एएसआय दिनकर धुर
अंमलदार संजय वानखडे, रवि काटकर, विजय मुलनकर
शहराच्या शिक्षण व सामाजिक क्षेत्रावर सावट
या प्रकरणाची सर्वात चिंताजनक बाब म्हणजे, अटकेत असलेला एक आरोपी वैद्यकीय शिक्षण घेत असलेला युवक आहे. शहरात उच्च शिक्षण घेत असलेल्या तरुणांमध्ये जर अशा स्वरूपाचे गुन्हे वाढत असतील, तर ही केवळ पोलिसांचीच नव्हे, तर संपूर्ण समाजाची जबाबदारी आहे.
त्याचप्रमाणे, पोलीस मित्र म्हणून काम करणाऱ्या व्यक्तीवर जर असे गंभीर आरोप लागतात, तर पोलिस यंत्रणेच्या विश्वासार्हतेवरही प्रश्नचिन्ह उभं राहतं.
ड्रग्सविरोधात सामाजिक जागृती हाच उपाय!
या घटनेमुळे पुन्हा एकदा सिद्ध झालं की, एमडी ड्रग्ससारखे जीवघेणे अमली पदार्थ आता लहान शहरांमध्येही मुळं रोवू लागलेत. याला आळा घालण्यासाठी केवळ पोलिसांची कारवाई पुरेशी नाही, तर शाळा, महाविद्यालयं, सामाजिक संस्था आणि राजकीय पक्षांनीही सक्रिय भूमिका घेणं अत्यावश्यक आहे. या कारवाईने एक साखळी उघड झाली आहे... पण संपूर्ण नेटवर्क शोधून त्याचा बीमोड करणं, ही खरी कसरत आहे.
महत्त्वाच्या बातम्या
