Devendra Fadnavis: कुर्ला बस अपघातात 7 ठार, देवेंद्र फडणवीसांची मोठी घोषणा, BMC आणि बेस्टला महत्त्वाचा आदेश
Devendra Fadnavis Kurla Best Bus Accident: कुर्ला बस अपघातातील मृतांच्या वारसांना मुख्यमंत्री निधीतून पाच लाख रुपयांची मदत जाहीर करण्यात आली आहे. तर जखमींचा उपचारांचा खर्च महापालिका आणि बेस्टच्यावतीने करण्याचे आदेश फडणवीसांनी दिले आहेत.
मुंबई: कुर्ला एलबीएस मार्गावरच्या मार्केटमध्ये काल (सोमवारी 9 डिसेंबर) रात्री 8.30 वाजण्याच्या सुमारास भरधाव वेगाने शिरलेल्या इलेक्ट्रिक बेस्ट बसने (Kurla Best Bus Accident) अनेकांना धडक दिली. या अपघातामध्ये आतापर्यंत 7 जणांचा मृत्यू झाल्याची माहिती समोर आली आहे. तर 48 ते 50 जण गंभीर जखमी झाल्याची माहिती आहे. सदर बस जवळपास 8 ते 10 वाहनांना उडवत मार्केट परिसरात गेली. ही घटना सीसीटीव्ही कॅमेऱ्यामध्ये कैद झाली आहे. या घटनेनंतर एकच खळबळ उडाली आहे, घटनेचा तपास सुरू आहे, तर जखमींवर रूग्णालयात उपचार सुरू आहेत, या घटनेत मृत्यू झालेल्यांच्या कुटुंबियांना मुख्यमंत्री सहायता निधीतून राज्याचे मुख्यमंत्री देवेंद्र फडणवीसांनी 5 लाख रुपयांची आर्थिक मदत जाहीर केली आहे.
त्याचबरोबर या घटनेत मृत कुटुंबियांच्या दुःखात आम्ही सहभागी आहोत. तसेच जखमींच्या प्रकृतीत लवकर सुधारणा व्हावी, यासाठी मी प्रार्थना करतो, असेही मुख्यमंत्री देवेंद्र फडणवीस यांनी म्हटले आहे. या घटनेत जे जखमी झाले, त्यांच्या उपचाराचा खर्च मुंबई महापालिका आणि बेस्टच्या वतीने करण्यासाठी आदेश देण्यात आले आहेत, असेही मुख्यमंत्री देवेंद्र फडणवीस यांनी सांगितले आहे. फडणवीसांनी याबाबत सोशल मिडिया एक्सवरती पोस्ट लिहून घटनेतील मृतांना श्रद्धांजली वाहिली आहे, तर जखमींच्या प्रकृतीत लवकर सुधारणा व्हावी अशी प्रार्थना केली आहे.
मुख्यमंत्री देवेंद्र फडणवीस यांची पोस्ट काय?
कुर्ला येथे बेस्ट बसच्या अपघातात काही लोकांचे मृत्यू झाले, त्याबद्दल तीव्र दुःख व्यक्त करत मुख्यमंत्री देवेंद्र फडणवीस यांनी भावपूर्ण श्रद्धांजली अर्पण केली आहे. त्यांच्या कुटुंबियांच्या दुःखात आम्ही सहभागी आहोत. तसेच जखमींच्या प्रकृतीत लवकर सुधारणा व्हावी, यासाठी मी प्रार्थना करतो, असेही त्यांनी म्हटले आहे. या घटनेतील मृतांच्या वारसांना मुख्यमंत्री सहायता निधीतून 5 लाख रुपये आर्थिक मदत देण्यात येईल, असेही त्यांनी सांगितले आहे. या घटनेत जे जखमी झाले, त्यांच्या उपचाराचा खर्च मुंबई महापालिका आणि बेस्टच्या वतीने करण्यासाठी आदेश देण्यात आले आहेत, असेही मुख्यमंत्री देवेंद्र फडणवीस यांनी सांगितले आहे.
कुर्ला येथे बेस्ट बसच्या अपघातात काही लोकांचे मृत्यू झाले, त्याबद्दल तीव्र दुःख व्यक्त करत मुख्यमंत्री देवेंद्र फडणवीस यांनी भावपूर्ण श्रद्धांजली अर्पण केली आहे. त्यांच्या कुटुंबियांच्या दुःखात आम्ही सहभागी आहोत. तसेच जखमींच्या प्रकृतीत लवकर सुधारणा व्हावी, यासाठी मी प्रार्थना…
— @OfficeOfDevendra (@Devendra_Office) December 10, 2024
अजित पवारांची पोस्ट
उपमुख्यमंत्री अजित पवारांनी देखील सोशल मिडियावर पोस्ट शेअर केली आहे, पोस्टमध्ये त्यांनी, 'कुर्ला रेल्वे स्थानक परिसरात एस जी बर्वे रोड येथे भरधाव बेस्ट बसनं अनेक लोकांना चिरडल्याची तसंच या अपघातात काहींचा दुर्दैवी मृत्यू झाल्याची घटना अतिशय दुःखद आहे. मृत्यू पावलेल्यांना मी भावपूर्ण श्रद्धांजली अर्पण करतो. त्यांच्या कुटुंबियांप्रती सहसंवेदना व्यक्त करतो. या दुर्घटनेत अनेक जण जखमी झाले असून त्यांच्यावर नजीकच्या रुग्णालयांत उपचार सुरू आहेत. सर्वांच्या प्रकृतीत लवकरात लवकर सुधारणा होवो हीच ईश्वरचरणी प्रार्थना करतो. या घटनेची सखोल चौकशी केली जाईल, दोषी आढळणाऱ्यांवर कठोर कायदेशीर कारवाई केली जाईल', असं म्हटलं आहे.
कुर्ला रेल्वे स्थानक परिसरात एस जी बर्वे रोड येथे भरधाव बेस्ट बसनं अनेक लोकांना चिरडल्याची तसंच या अपघातात काहींचा दुर्दैवी मृत्यू झाल्याची घटना अतिशय दुःखद आहे. मृत्यू पावलेल्यांना मी भावपूर्ण श्रद्धांजली अर्पण करतो. त्यांच्या कुटुंबियांप्रती सहसंवेदना व्यक्त करतो.
— Ajit Pawar (@AjitPawarSpeaks) December 10, 2024
या…
अंजली दमानियांनी उपस्थित केला सवाल
सामाजिक कार्यकर्त्या अंजली दमानिया यांनी या घटनेवर सवाल उपस्थित करत, 'निःशब्द ! दोष कुणा कुणाला द्यायचा ? पूर्ण सिस्टम सडलेली आहे,' अशी पोस्ट शेअर केली आहे.
निःशब्द !
— Mrs Anjali Damania (@anjali_damania) December 10, 2024
दोष कुणा कुणाला द्यायचा ?
पूर्ण सिस्टम सडलेली आहे. pic.twitter.com/93sW2mKGnn
प्रकरण नेमकं काय?
कुर्ला एलबीएस रोडवर बेस्ट बसने अनेकांना उडवल्याची घटना काल घडली आहे. अपघातात आतापर्यंत 7 जणांचा मृत्यू झाला आहे तर तर अनेक जण गंभीर जखमी झाल्याची माहिती आहे. दरम्यान, अपघात झाल्यानंतर घटनास्थळी मोठी गर्दी झाली आहे. घटनास्थळी पोलीस दाखल झाले आहेत.
सदर अपघात घडला तेव्हा अपघातग्रस्त बसमध्ये तब्बल 60 प्रवासी प्रवास करत असल्याचे पोलिसांनी सांगितले आहे. बस चालक संजय मोरे या बस चालकाला पोलिसांनी अटक केली. त्याच्यावर सदोष मनुष्यवधाचा गुन्हा दाखल करण्यात आला आहे. या संपूर्ण अपघाताचा सीसीटीव्ही समोर आला आहे. 332 नंबरची बस कुर्ल्याहून अंधेरीकडे जात असताना हा अपघात घडला आहे. तसेच या अपघातानंतर जमावाने बस चालकाला बेदम मारहाण केल्याचं देखील व्हिडीओद्वारे समोर आलं आहे. अपघात घडल्यानंतर बस चालक संजय मोरे याला नागरिकांकडून मारहाण करण्यात आली. यावेळी पोलिसांनी धाडस दाखवत संजय मोरेला बाहेर काढलं आणि पोलीस स्थानकात घेऊन गेले.
महत्त्वाच्या बातम्या
