LIC GST Notice :  LIC ला मोठा झटका, 806 कोटींची GST नोटीस; तरीही शेअर दर वधारला

LIC : एलआयसीला विमा कंपनीला 806 कोटी रुपयांची जीएसटी नोटीस मिळाली आहे.

LIC GST Notice :  LIC ला मोठा झटका, 806 कोटींची GST नोटीस; तरीही शेअर दर वधारला

LIC GST Notice :  सार्वजनिक क्षेत्रातील विमा कंपनी एलआयसी (LIC) ला 2024 च्या सुरुवातीला मोठा झटका बसला आहे. विमा कंपनीला 806 कोटी रुपयांची जीएसटी नोटीस मिळाली आहे. नोटीसनुसार, यामध्ये 365.02 कोटी रुपयांचा जीएसटी, 404.7 कोटी रुपयांचा दंड आणि 36.5 कोटी रुपयांच्या व्याजाचा समावेश आहे. या नोटिशीच्या विरोधात अपील करणार असल्याचे एलआयसीने म्हटले आहे.

कंपनीने नियामकाला दिली माहिती

भारतीय आयुर्विमा महामंडळाला (Life Insurance Corporation of India) राज्य कर उपायुक्त, मुंबई यांच्याकडून ही GST नोटीस प्राप्त झाली आहे. कंपनीने आपल्या नियामक फाइलिंगमध्ये म्हटले आहे की ते या नोटिशीच्या विरोधात अपील दाखल करणार आहेत. कंपनीवर इनपुट टॅक्स क्रेडिटच्या नॉन रिव्हर्सल नियमांचे उल्लंघन केल्याचा आरोप आहे.

कोणताही परिणाम होणार नसल्याचा दावा

जीएसटी भरण्याची नोटीस मिळाल्यानंतर, एलआयसीने सांगितले की ते निर्धारित वेळेत मुंबईतील आयुक्तांसमोर अपील दाखल करणार आहेत. मात्र, या GST नोटिसीचा कंपनीच्या आर्थिक, परिचालन किंवा इतर कोणत्याही कामांवर कोणताही परिणाम होणार नाही, असेही एलआयसीने स्पष्ट केले आहे. 

ऑक्टोबर 2023 मध्ये मिळाली होती 37 हजार कोटी रुपयांची नोटीस

यापूर्वी ऑक्टोबर 2023 मध्ये एलआयसीला सुमारे 37 हजार कोटी रुपयांचा जीएसटीचा भरणा करण्याचा आदेश पाठवण्यात आला होता. सरकारी कंपनीवर 2019-20 च्या मूल्यांकन वर्षात काही इनव्हॉईसवर 18 टक्क्यांऐवजी 12 टक्के दराने कर भरल्याचा आरोप होता. श्रीनगरच्या राज्य आयकर अधिकाऱ्याने कंपनीवर 10462 कोटी रुपयांचा जीएसटी, 20 हजार कोटी रुपयांचा दंड आणि 6,382 कोटी रुपयांचे व्याज आकारले होते.

ऑक्टोबर आणि सप्टेंबरमध्येही आल्या नोटिसा 

याआधीही ऑक्टोबरमध्ये एलआयसीला 84 कोटी रुपये आणि सप्टेंबरमध्ये 290 कोटी रुपयांच्या आयकर दंडाच्या नोटिसा पाठवण्यात आल्या होत्या. एका बाजूला जीएसटीची नोटीस आली असताना दुसरीकडे सोमवारी बीएसईवर एलआयसीचे शेअर्स 3.1 टक्क्यांनी वधारले. सोमवारी दिवस अखेर 858.35 रुपयांवर एलआयसीचा शेअर दर स्थिरावला.