HDFC Bank : एचडीएफसी बँकेचा नियम बदलाचा धडाका सुरुच, चार रोख व्यवहारानंतर 150 रुपये द्यावे लागणार
HDFC Bank Rule Change :एचडीएफसी बँकेनं रोख व्यवहारांसंदर्भातील नियम बदलला आहे. चारपेक्षा अधिक रोख व्यवहार केल्यास 150 रुपयांचं शुल्क प्रति व्यवहार द्यावं लागणार आहे.
नवी दिल्ली : एचडीएफसी बँकेनं बचत खात्यातील रोख व्यवहारांसंदर्भात नियमांमध्ये बदल केला आहे. एचडीएफसी बँकेच्या बचत खातेदारांना दरमहा स्वत : किंवा त्रयस्थातर्फे बँक खात्यात 1 लाख रुपयांपर्यंत रक्कम भरता येईल. यापूर्वी ही रक्कम 2 लाख रुपये होती. बचत खात्यात रोख रक्कम जमा करण्यासंदर्भातील मर्यादा पूर्वीप्रमाणेच 4 व्यवहार अशी आहे. मात्र, आता त्यानंतरच्या प्रत्येक रोख व्यवहारावर 150 रुपये शुल्क आकारलं जाईल. बँकेच्या या निर्णयाचा थेट परिणाम मध्यमवर्गीय आणि कमी उत्पन्न असणाऱ्या खातेंदारांवर होणार आहे. यासह इतर नियम 1 ऑगस्टपासून लागू होणार आहेत.
त्रयस्थ व्यक्तीकडून करण्यात येणारे रोख व्यवहार म्हणजे खातेदाराऐवजी दुसऱ्या व्यक्तीनं बँक खात्यात पैसे जमा करणे किंवा काढणे. यामध्ये नातेवाईक, मित्र किंवा प्रतिनिधीचा समावेश असू शकतो. एचडीएफसी बँकेच्या या निर्णयानुसार चार व्यवहारांनंतरच्या प्रत्येक व्यवहारावर 150 रुपये शुल्क आकारलं जाईल. मोफत व्यवहारांची मर्यादा संपल्यानंतर किमान प्रति 1000 रुपयांसाठी 5 रुपये किंवा 150 रुपये या प्रमाणात शुल्क आकारलं जाईल. त्रयस्थ व्यक्तीकडून करण्यात येणाऱ्या रोख रकमेच्या व्यवहारांची मर्यादा 25000 रुपये इतकी आहे.
एचडीएफसी बँकेनं इतर व्यवहारांवरील शुल्क देखील बदललं आहे.
एनईएफटी व्यवहार शुल्क
10000 रुपयांपर्यंत : 2 रुपये
10 हजार ते 1 लाख रुपये : 4 रुपये
1 लाख ते 2 लाख रुपये : 6 रुपये
2 लाख रुपयांपेक्षा अधिक रकमेचे व्यवहार : 24 रुपये
आरटीजीएसद्वारे पैसे पाठवण्यावरील शुल्क
2 लाख ते 5 लाख रुपये : 20 रुपये
5 लाखांपेक्षा अधिक रक्कम : 45 रुपये
आयएमपीएसद्वारे केले जाणार व्यवहार
1000 रुपयांपर्यंत : 2.50 रुपये
1 हजार ते 1 लाख रुपये : 5 रुपये
1 लाखांपेक्षा अधिक रक्कम : 15 रुपये
ईसीएस आणि एसीएच रिटर्न चार्जेस : इलेक्ट्रॉनिक क्लिअरिंग सिस्टीमचे व्यवहार फेल झाल्यास पहिल्यावेळी 450 रुपये, दुसऱ्यावेळी 500 आणि तिसऱ्या वेळी 550 रुपये शुल्क आकारलं जाईल.
एचडीएफसी बँकेकडून शिल्लक प्रमाणपत्र, व्याज प्रमाणपत्र आणि पत्त्याची पडताळणी यासाठी 100 रुपये शुल्क आकारलं जाईल. तर, ज्येष्ठ नागरिकांसाठी 90 रुपये शुल्क असेल. जुन्या रेकॉर्डची कॉपी आणि चेकची प्रत यासाठी 80 रुपये शुल्क आकारलं जाईल.
एचडीएफसी बँकेकडून प्रत्येक वर्षात बचत खातेदाराला 10 पानांचं चेकबुक दिलं जाईल. यापूर्वी खातेदारांना 25 पानांचं चेकबुक दिलं जायचं. यानंतर अतिरिक्त प्रत्येक पानासाठी 4 रुपये शुल्क द्यावं लागेल.
दरम्यान, एचडीएफसी बँकेनं आयसीआयसीआय बँकेनंतर किमान मासिक सरासरी शिल्लक रकमेच्या नियमात बदल केल्याबाबत चर्चा सुरु होत्या. मात्र, एचडीएफसी बँकेनं किमान शिल्लक रक्कम नियमात बदल केला नसल्याचं म्हटलं आहे.
Before You Go
Liquor Brands Banned: भारतात कोणत्या ब्रँड्सच्या रम आणि व्हिस्कीवर बंदी?, A टू Z माहिती
महत्त्वाच्या बातम्या
