ट्रम्प-पुतिन बैठक भारताच्या पथ्यावर?, डोनाल्ड ट्रम्प यांच्याकडून मोठे संकेत, रशियाकडून तेलखरेदी करणाऱ्या देशांबाबत म्हणाले...
Donald Trump : अमेरिकेचे अध्यक्ष डोनाल्ड ट्रम्प यांनी रशियाचे अध्यक्ष व्लादिमीर पुतिन यांच्यासोबतच्या बैठकीनंतर रशियाकडून तेल खरेदी करणाऱ्या देशांबाबत मोठे संकेत दिले आहेत.
नवी दिल्ली : अमेरिकेचे अध्यक्ष डोनाल्ड ट्रम्प यांनी शुक्रवारी रशियाचे अध्यक्ष व्लादीमीर पुतिन यांची अलास्का येथे भेट घेतली. या बैठकीत रशिया आणि यूक्रेन युद्ध थांबवण्याबाबत सहमती ट्रम्प आणि पुतिन यांच्यात होऊ शकली नाही. मात्र, ट्रम्प यांनी रशियाकडून तेल खरेदी करणाऱ्या चीन आणि भारतासारख्या देशांवर नव्यानं टॅरिफ लावण्याचा विचार करण्याची गरज नसल्याचं म्हटलं. मात्र, येत्या दोन ते तीन आठवड्यात या मुद्यावर फेरविचार करु असा इशारा देखील ट्रम्प यांनी दिला आहे.
फॉक्स न्यूजसोबत बोलताना ट्रम्प यांनी नव्या टॅरिफ संदर्भात संकेत दिले. ते म्हणाले आज जे झालं त्यामुळं मला वाटतं की याबाबत जास्त विचार करण्याची गरज नाही. मात्र, मला दोन ते तीन आठवड्यानंतर मला याबाबत विचार करावा लागेल. सध्या याचा विचार करण्याची गरज नाही. रॉयटर्स अनुसार डोनाल्ड ट्रम्प यांचं हे वक्तव्य रशियाकडून तेल खरेदी करणाऱ्या देशांबाबत आहे.
डोनाल्ड ट्रम्प यांनी भारतावर अधिक आयात शुल्क लावल्यामुळं रशियाला या बैठकीबाबत विचार करावा लागला. डोनाल्ड ट्रम्प म्हणाले की जेव्हा मी भारताला म्हटलं की तुमच्याकडून आयात शुल्क घेऊ कारण तुम्ही रशियासोबत व्यापार करता, तेल खरेदी करता, आमच्या या भूमिकेमुळं रशियावरील दबाव वाढला आणि त्यानंतर रशियानं फोन करुन भेटण्याची इच्छा व्यक्त केली.
अमेरिकेचे अध्यक्ष डोनाल्ड ट्रम्प म्हणाले भारत रशियाकडून तेल खरेदी करणारा दुसरा देश आहे. तो चीनच्या खूप जवळ पोहोचला होता. रशियाकडून तेल खरेदी सर्वात मोठा खरेदीदार चीन आहे.
डोनाल्ड ट्रम्प यांनी भारतावर आयात शुल्क लादलं तरी देखील तेल खरेदीबाबतचं धोरण बदललं नाही. इंडियन ऑईल कॉर्पोरेशनचे अध्यक्ष एएस साहनी यांनी रशियाकडून होत असलेल्या तेल खरेदीवर स्थगिती नसल्याचं म्हटलं. आर्थिक आधारावर खरेदी यापुढं देखील सुरु राहील. विदेश मंत्रालयानं ट्रम्प टॅरिफ चुकीचं असल्याचं म्हटलं.
दरम्यान, अमेरिकेचे अध्यक्ष डोनाल्ड ट्रम्प यांनी भारतावरील टॅरिफ दुप्पट केलं आहे. भारतावर पहिल्यांदा 25 टक्के टॅरिफ लावलं होतं, ते वाढवून 50 टक्के केलं असून त्याची अंमलबजावणी 27 ऑगस्टपासून केली जाणार आहे. डोनाल्ड ट्रम्प आणि व्लादिमीर पुतिन यांच्या भेटीत रशिया यूक्रेन युद्धावर तोडगा निघालेला नाही. आता डोनाल्ड ट्रम्प आणि यूक्रेनचे अध्यक्ष वोलोदिमीर झेलेन्स्की यांची बैठक होणार आहे. त्यात युद्धाबाबत काय तोडगा निघतो हे पाहावं लागेल.
महत्त्वाच्या बातम्या
