Bihar Election Result : बिहारमध्ये 90 टक्के आमदार कोट्यधीश, सर्वात श्रीमंत आमदाराकडे 170 कोटींची संपत्ती, सर्वात गरीब आमदाराची संपत्ती किती?
Bihar Election : बिहार विधानसभा निवडणुकीत एनडीएनं महागठबंधनचा धुव्वा उडवला आहे. बिहारमध्ये एनडीए पुन्हा सत्तेत आलं आहे. बिहारचा श्रीमंत आमदार देखील एनडीए चा आहे.
नवी दिल्ली : बिहार विधानसभा निवडणुकीचा निकाल जाहीर झाला आहे. भाजप-जदयू, लोजपा रामविलास, हम पार्टी यांच्या एनडीएनं पुन्हा सत्ता मिळवली आहे. बिहारच्या विधानसभेतील श्रीमंत आमदारांची संख्या यावेळी वाढली आहे. आमदारांच्या संपत्तीत देखील मागील टर्मच्या तुलनेत मोठी वाढ झाली आहे. आमदारांची सरासरी संपत्ती दुप्पट झाली आहे. बिहार विधानसभेच्या २४३ आमदारांपैकी 218 आमदार कोट्यधीश आहेत. मागील टर्ममध्ये ही संख्या 194 होती म्हणजेच यावेळी कोट्यधीश आमदारांची संख्या वाढली आहे.
असोसिएशन फॉर डेमोक्रॅटिक रिफॉर्म्स आणि इलेक्शन वॉच यांच्याकडून आमदारांच्या प्रतिज्ञापत्रांचा अभ्यास करण्यात आला त्यानुसार बिहार विधानसभेच्या उमेदवारांची एकूण संपत्ती 2139 कोटी रुपये आहेत. मागील पाच वर्षांपूर्वी बिहारच्या आमदारांची सरासरी संपत्ती 4.32 कोटी रुपये होती. ती आता 9.2 कोटी रुपयांवर पोहोचली आहे.
बिहारमधील सर्वात श्रीमंत आमदार भाजपचे मुंगेर विधानसभा मतदारसंघाचे कुमार प्रणय आहेत. ज्यांच्या नावावर 170 कोटी रुपयांची संपत्ती आहे. सर्वात कमी संपत्ती असणाऱ्या आमदारांच्या यादीत मुरारी पासवान पहिल्या स्थानावर आहेत, ज्यांची घोषित संपत्ती 6 लाख रुपये आहे. जदयूचे वादग्रस्त आमदार अनंत सिंह यांच्यानावावर 100 कोटींपेक्षा अधिक संपत्ती आहे. भाजप आमदार महेश पासवान यांच्या नावावर 8 लाखांची संपत्ती आहे.
कोणत्या पक्षाचे किती आमदार कोट्यधीश?
भाजपचे 89 पैकी 77 आमदार, जदयूचे 85 पैकी 78,राजदचे 24 आमदार, लोजपा रामविलासचे 16 आमदार, काँग्रेसचे 6 आमदार, एमआयएमचे पाच आमदार, सीपीएमचा 1 आमदार, सीपीआय माले लिबरेशनचा एक आमदार कोट्यधीश आहे.
राष्ट्रीय लोक मोर्चाच्या चार आमदारांची संपत्ती 22.93 कोटी रुपये आहे. सीपीएआय मालेच्या दोन आमदारांची सरासरी संपत्ती 1.46 कोटी, भाजपच्या 89 आमदारांकडे सरासरी 8.68 रुपये, जदूयच्या 85 आमदारांची सरासरी संपत्ती 9.53 कोटी रुपये, राजदच्या आमदारांची सरासरी संपत्ती 5.80 कोटी, लोजपा राम विलासच्या आमदारांची सरासरी संपत्ती 13.66 कोटी रुपये आहे. काँग्रेसच्या 6 आमदारांची सरासरी संपत्ती 4.82 कोटी रुपये आहे. हम पार्टीच्या आमदारांची सरासरी संपत्ती 6.16 कोटी आणि एमआयएमच्या आमदारांची सरासरी 2.1 कोटी रुपये आहे.
बिहारमधील पक्षीय बलाबल
भाजप :89
जदयू : 85
लोजपा रामविलास : 19
हम पार्टी : 5
राष्ट्रीय लोक मोर्चा : 4
राजद : 25
काँग्रेस : 6
एमआयएम : 5
सीपीआय माले लिबरेशन : 2
भारत सर्वसमावेशक पार्टी :1
माकप : 1
बसपा : 1
महत्त्वाच्या बातम्या
