Apple CEO Tim Cook: 'अॅपल'कडून सीईओच्या पगारात 40 टक्क्यांची कपात; किती मिळणार पगार, पाहा
Apple CEO Tim Cook: अॅपल कंपनीने आपले सीईओ टीम कूक यांच्या पगारात 40 टक्क्यांची कपात केली आहे. अॅपल कंपनीने अमोरिकन शेअर बाजाराला याबाबतची माहिती दिली आहे.
Apple CEO Tim Cook: 'अॅपल'कडून सीईओ (Apple CEO) टीम कूक (Tim Cook) यांच्या पगारात 40 टक्क्यांची कपात करण्यात आली आहे. ही वेतन कपात 2023 वर्षातील पगारात असणार आहे. कंपनीच्या शेअरहोल्डर्सकडून मागणी करण्यात आल्यानंतर ही कपात करण्यात आली आहे. गुरुवारी कंपनीने अमेरिक शेअर बाजार नियामक प्राधिकरणाकडे याबाबतची माहिती दिली आहे. टीम कूक यांना 'कामगिरी आधारीत वेतन' (Pay With Performance) लागू असणार असल्याची माहिती अॅपलने दिली.
अॅपलचे सीईओ टीम कूक (Apple CEO Tim Cook) यांना वर्ष 2022 मध्ये 99.4 दशलक्ष अमेरिकन डॉलर्स इतका वार्षिक पगार होता. आता त्यांना वर्ष 2023 मध्ये 49 दशलक्ष अमेरिकन डॉलर्स (3,98,75,71,000 रुपये) इतके वेतन मिळणार आहे. टीम कूक यांच्या नव्या वेतनात वर्ष 2022 प्रमाणे 3 दशलक्ष डॉलर्स इतके मूळ वेतन असणार आहे. तर, सहा दशलक्ष डॉलर्स इतका बोनस मिळणार आहे. तर, 40 दशलक्ष डॉलर्सची रक्कम इक्विटी द्वारे असणार आहे.
अॅपलने नियामक प्राधिकरणाला दिलेल्या माहितीनुसार, कुक यांना देण्यात आलेले नवीन वेतन हे समभागधारकांची शिफारस, अॅपलची कामगिरी आणि सीईओंनी केलेल्या शिफारसींवर आधारीत आहे. कूक यांना वार्षिक लक्ष्य आधारीत (Annual Target Compensation) 80 ते 90 टक्क्यांपर्यंत रक्कम देण्यात येण्याचे नियोजन असल्याचे कंपनीने म्हटले आहे.
पिचाई, नडेला, मस्क यांना किती पगार?
वृत्तसंस्थांच्या वृत्तानुसार, गुगलचे सीईओ सुंदर पिचाई यांचा वार्षिक पगार सुमारे 242 दशलक्ष अमेरिकन डॉलर म्हणजे सुमारे 1880 कोटी रुपयांच्या घरात आहे.
मायक्रोसॉफ्टचे सीईओ सत्या नडेला यांना वर्ष 2022 मध्ये एकूण वार्षिक पगार 54.9 दशलक्ष डॉलर इतका होता.
इलेक्ट्रीक कार कंपनी 'टेस्ला'ने वर्ष 2018 सीईओ एलन मस्क यांना आगामी 10 वर्षांसाठी 56 अब्ज डॉलर पॅकेज जाहीर केले होते. मस्क यांना एवढे वेतन देण्यास काही समभागधारकांचा विरोध होता. मात्र, 70 टक्के समभागधारकांनी मस्क यांच्या बाजूने मतदान केले.
'बिझनेस इनसाइडर'च्या वृत्तानुसार, वर्ष 2021 मध्ये प्रसिद्ध ई-कॉमर्स कंपनी Amazon चे CEO अॅण्डी जॅस्सी (Andy Jassy) यांचा वार्षिक पगार 212 दशलक्ष डॉलर इतका होता. अॅमेझॉनचे संस्थापक जेफ बेझोस यांच्या जागी अँडी जॅस्सी यांची कंपनीचे सीईओ म्हणून नियुक्त करण्यात आले होते.
महत्त्वाच्या बातम्या
ट्रेंडिंग न्यूज
