Animal husbandry : महाराष्ट्राला पशुसंवर्धन पायाभूत सुविधा विकास निधी योजनेचा प्रथम क्रमांकाचा पुरस्कार, राज्यात 793 कोटींचे कर्ज वाटप
पशुसंवर्धन पायाभूत सुविधा विकास निधी योजनेचा पहिल्या क्रमांकाचा पुरस्कार महाराष्ट्राला मिळाला आहे. या योजनेंतर्गंत राज्यात 793 कोटींचे कर्ज वाटप करण्यात आले आहे.
Animal husbandry infrastructure : महाराष्ट्राला पशुसंवर्धन पायाभूत सुविधा विकास निधी योजनेचा पहिल्या क्रमांकाचा पुरस्कार मिळाला आहे. या योजनेंतर्गंत राज्यात 793 कोटींचे कर्ज वाटप करण्यात आले असून, 53 कोटींची व्याज सवलत प्रदान करण्यात आलं आहे. केंद्र शासनाच्या पशुसंवर्धन पायाभूत सुविधा विकास निधी योजनेच्या लाभासाठी जास्तीत जास्त उद्योजकांना प्रेरित करणे. तसेच या योजनेबाबत जागरुकता निर्माण करण्यात महाराष्ट्राने देशात प्रथम क्रमांक पटकावला आहे. या उपलब्धीसाठी केंद्रीय मत्स्य, पशुसंवर्धन आणि दुग्धमंत्री पुरुषोत्तम रुपाला यांच्या हस्ते राज्याला सन्मानित करण्यात आले.
केंद्रीय मत्स्य, पशुसंवर्धन आणि दुग्ध मंत्रालयाच्यावतीनं दिल्लीतील डॉ. आंबेडकर इंटरनॅशनल सेंटरमध्ये आयोजित 'पशुसंवर्धन पायाभूत सुविधा विकास निधी संमेलनात' हे पुरस्कार प्रदान करण्यात आले. याप्रसंगी केंद्रीय मत्स्य, पशुसंवर्धन आणि दुग्ध राज्यमंत्री डॉ. संजीव कुमार बालियान आणि विभागाचे सचिव अतुल चतुर्वेदी यांच्यासह वरिष्ठ अधिकारी उपस्थित होते. राज्ये, उद्योजक आणि बँकांना यावेळी सन्मानित करण्यात आले.
महाराष्ट्रातसह कर्नाटक आणि उत्तर प्रदेशला पुरस्कार
पशुसंवर्धन पायाभूत सुविधा विकास निधी योजनेत जास्तीत-जास्त उद्योजकांना प्रेरित करण्यासाठी तसेच योजनेच्या जागरुकतेसाठी केलेल्या उत्कृष्ट कार्यासाठी यावेळी देशातील तीन राज्यांना गौरवण्यात आले. यात महाराष्ट्राला पहिल्या क्रमांकाचा पुरस्कार प्रदान करण्यात आला. राज्याच्या पशुसंवर्धन विभागाचे आयुक्त सचिंद्र प्रताप सिंह यांनी पुरस्कार स्वीकारला. कर्नाटक राज्याला दुसरा तर उत्तरप्रदेशला तिसऱ्या क्रमांकाचा पुरस्कार वितरीत करण्यात आला.
उद्योजकांना 793 कोटींचे कर्ज वाटप
केंद्र शासनानं पशुपालन व दुग्ध व्यवसायाच्या प्रगतीसाठी वर्ष 2020 मध्ये पशुसंवर्धन पायाभूत सुविधा विकास निधी योजना सुरु केली. राज्यातील उद्योजकांकडून या योजनेला चांगला प्रतिसाद मिळाला. राज्य शासनाकडे एकूण 916 अर्ज प्राप्त झाले होते. यापैकी पात्र 73 अर्जांमधून आतापर्यंत 26 अर्जांना मंजुरी देण्यात आली आहे. या उद्योजकांना 793 कोटींचे कर्ज वाटप आणि 53 कोटींची व्याज सवलत देण्यात आल्याचे आयुक्त सिंह यांनी सांगितले. या योजनेंतर्गत राज्य शासनाला एकूण 15 हजार कोटींचा निधी प्राप्त झाला आहे.
महाराष्ट्रातील 20 उद्योजकांचा सन्मान
पशुसंवर्धन पायाभूत सुविधा विकास निधी योजनेंतर्गत उत्कृष्ट कार्य करणाऱ्या देशातील 75 व्यक्ती व संस्थांना या संमेलनात गौरविण्यात आले. यात महाराष्ट्रातील 20 व्यक्ती आणि संस्थांचा समावेश आहे. या कार्यक्रमात 75 पैकी प्रातिनिधिक 10 उद्योजकांना केंद्रीय मत्स्य, पशुसंवर्धन आणि दुग्ध मंत्री पुरुषोत्तम रुपाला यांच्या हस्ते गौरविण्यात आले. यात महाराष्ट्रातून कोल्हापूर जिल्ह्यातील ज्योर्तिलिंग मिल्क फुड आणि अहमदनगर जिल्ह्यातील जप्फा कॉम्फीड इंडिया लि. चा सन्मान करण्यात आला.
कोल्हापूर जिल्ह्यातील गोविंद फिड मिल, रोहिणी सुचित्रा पोवार, अनुप श्रीनिवास पडमल या संस्था व व्यक्तींना यावेळी गौरविण्यात आले. पुणे जिल्ह्यातील विशाल अशोक मोकाशी, हुवेफार्मसी पुणे प्रा. लि, नेचर डिलाइट कॅटल फीड्स प्रा. लि., ब्रिटानिया इंडस्ट्रीज लि. यांना गौरविण्यात आले. अहमदनगर जिल्ह्यातील कृष्णा डेअरी आणि मुंबई येथील ग्रॅव्हिस फूड्स प्रा. लि. चा सन्मान करण्यात आला. नागपूर जिल्ह्यातील गौगंगा फूड प्रा. लि.,जलाराम व्हेटकेअर इंडस्ट्रीज प्रा. लि. तसेच सोलापूर जिल्ह्यातील गणेश रामचंद्र आपटे प्रा. लि. चा सन्मान करण्यात आला. सातारा जिल्ह्यातील स्वामी मिल्क अँड मिल्क प्रोडक्टस् आणि उस्मानाबाद जिल्ह्यातील मयुर प्रताप पाटील, दमयंती फार्मर्स प्रोड्युसर कंपनी लि. चा सन्मान करण्यात आला. रायगड जिल्ह्यातील डेलेक्टो फूड्स प्रा. लि., बीड जिल्ह्यातील विमल ॲग्रो आणि सांगली जिल्ह्यातील एम. एस. बी जी चितळे यांनाही गौरविण्यात आले.
महत्त्वाच्या बातम्या
