सोलापूर : वाळू तस्कराचा तहसीलदारांकडून फिल्मी स्टाईल पाठलाग, डंपरसह चालक फरार

बेकायदा वाळू नेणारे वाळूमाफिया किती मस्तवाल झाले आहेत, याची प्रचिती काल सोलापुरात आली.उत्तर सोलापूरचे तहसीलदार विनोद रणनवरे यांनी बेकायदा वाळू नेणाऱ्या एका डंपरचा फिल्मी स्टाईल पाठलाग केला. मात्र डंपर चालकाला पसार होण्यात यश मिळालं.

तहसीलदार विनोद रणनवरे यांनी वाळू वाहतुकीचा डंपर थांबवण्याची सूचना दिली. पण डंपर चालक थांबला नाही. दुचाकीवरून तहसीलदारांनी डंपरचा पाठलाग केला.

शहराच्या मध्यवर्ती भागातून डंपर चालक सुसाट निघाला. तहसीलदार पाठलाग करत असल्याचं पाहून त्याने चालत्या डंपरमधून वाळू टाकायला सुरुवात केली. पूर्ण डंपर रिकामा झाला. पण डंपर चालक थांबला नाही.

शहराच्या बाहेर त्याने पलायन केलं. डंपरला नंबर प्लेटही नव्हती. अखेर तहसीलदारांना मागे फिरावं लागलं. रस्त्यावर पडलेली वाळू पोलिसांनी रात्रभर बाजूला सारली.