Bhaskar Jadhav vs Nilesh Rane Clashes : राणे-जाधव कार्यकर्त्यांमध्ये राडा; Chiplun मध्ये प्रचंड तणाव

रत्नागिरी:  भाजपचे नेते निलेश राणे यांच्या गुहागर येथील सभेपूर्वी चिपळूणमध्ये ठाकरे गट आणि भाजपचे कार्यकर्ते एकमेकांना भिडल्याची घटना समोर आली आहे. या राड्यामुळे मुंबई-गोवा महामार्गावर पोलिसांना अश्रूधुराच्या नळकांड्या फोडाव्या लागल्या. परिणामी या मार्गावरील वाहतूक ठप्प झाली. चिपळूण येथील भास्कर जाधव (Bhaskar Jadhav) यांच्या कार्यालयासमोर हा प्रकार घडला. निलेश राणे (Nilesh Rane) याठिकाणी आल्यानंतर भाजपच्या कार्यकर्त्यांनी घोषणाबाजी सुरु केली. त्याला भास्कर जाधव यांच्या कार्यकर्त्यांकडूनही जोरदार प्रत्युत्तर देण्यात आले.  यानंतर दोन्ही गटाचे कार्यकर्ते आमनेसामने आले आणि राड्याला सुरुवात झाली. दोन्ही गटाच्या कार्यकर्त्यांनी एकमेकांच्या दिशेने दगड भिरकावले. पोलिसांनी हस्तक्षेप करत दोन्ही गटाच्या कार्यकर्त्यांना दूर पिटाळले. मात्र, यानंतर भाजपच्या कार्यकर्त्यांनी भास्कर जाधव यांच्या कार्यालयाच्या परिसरातील अनेक गाड्यांच्या काचा फोडल्या.