Anil Deshmukh Pune Accident: धनिकपुत्राला वाचवण्यासाठी आणखी एक षडयंत्र,देशमुखांचा सरकारवर गंभीर आरोप

पुणे: पुण्यातील कल्याणीनगर परिसरात एका अल्पवयीन धनिकपुत्राने पोर्शे कारने दोघांना चिरडल्याची (Pune Car Accident) घटना घडली होती. या दुर्घटनेनंतर येरवाडा पोलीस आणि ससून रुग्णालयातील डॉक्टरांनी उद्योगपती विशाल अग्रवाल (Vishal Agrawal) यांच्या मुलाला वाचवण्यासाठी गंभीर आणि अक्षम्य लपवालपवी, फेरफार केले होते. या सगळ्याविरोधात जनतेने प्रचंड रोष व्यक्त केला होता. त्यानंतर आता राज्याचे माजी गृहमंत्री अनिल देशमुख (Anil Deshmukh) यांनी राज्य सरकारवर एक गंभीर आरोप केला आहे. या अपघातप्रकरणात विशाल अग्रवाल यांच्या मुलाला वाचवण्यासाठी आणखी एक षडयंत्र रचण्यात आल्याचे अनिल देशमुख यांनी म्हटले आहे. 

अनिल देशमुख यांनी गुरुवारी एक ट्विट केले आहे. या ट्विटमध्ये अनिल देशमुख यांनी म्हटले आहे की, पुणे हिट ॲन्ड रन प्रकरणामध्ये राजकीय दबावाखाली आरोपीचे रक्ताचे नमुने बदलून आरोपी दारु न पिल्याचा  अहवाल तयार करण्याचे प्रयत्न झाले,हे उघड झाले आहे. आता माजी गृहमंत्री म्हणुन माझी माहिती अशी आहे की, मृतकांच्या Viscera Report मध्ये Alcohol +ve यावे याकरिता पूर्णपणे तयारी झाली आहे. जेणेकरुन या प्रकरणामध्ये मृत झालेले मोटरसायकल वरील तरुण-तरुणी हे दारु पिऊन होते आणि त्यांच्यामुळेच हा अपघात झाला, असे न्यायालयात सिद्ध करता येईल. जेणेकरून विशाल अग्रवालचा मुलगा लवकर सुटेल, अशा पध्दतीने प्रयत्न सध्या सरु आहेत, असा धक्कादायक आरोप अनिल देशमुख यांनी केला आहे. या सगळ्यावर आता मुख्यमंत्री एकनाथ शिंदे आणि गृहमंत्री देवेंद्र फडणवीस काही बोलणार का, हे पाहावे लागेल.