Kolhapur LPG Cylinder Shortage: कोल्हापुरात लग्न सुद्धा गेली गॅसवर, सिलेंडर मिळेनात, तब्बल तीन आमदारांच्या घरात सुद्धा मोठी लगीनघाई; जिल्हा पुरवठा अधिकारी नेमकं काय म्हणाल्या? कॅटरर्सना सुद्धा सूचना
Kolhapur LPG Cylinder Shortage:कोल्हापूर जिल्ह्यासाठी गॅसचा मुबलक साठा उपलब्ध असून नागरिकांनी घाबरून जाण्याचे कोणतेही कारण नाही, अशी ग्वाही जिल्हा पुरवठा अधिकारी मोहिनी चव्हाण यांनी दिली आहे.
Kolhapur LPG Cylinder Shortage: इराणविरोधातील अमेरिका आणि इस्त्रायलने पुकारलेल्या युद्धाचा आज (13 मार्च) 14 वा दिवस आहे. मात्र, त्याचे चटके भारताला सर्वाधिक बसू लागले आहेत. पेटलेल्या युद्धाच्या पार्श्वभूमीवर निर्माण झालेल्या भीतीपोटी नागरिक मोठ्या प्रमाणावर गॅस बुकिंगसाठी गर्दी करत असून, यामुळे यंत्रणेवर ताण येत आहे. मात्र, कोल्हापूर जिल्ह्यासाठी गॅसचा मुबलक साठा उपलब्ध असून नागरिकांनी घाबरून जाण्याचे कोणतेही कारण नाही, अशी ग्वाही जिल्हा पुरवठा अधिकारी मोहिनी चव्हाण यांनी दिली आहे. केंद्र सरकारने एक मोठा निर्णय घेत हॉटेल आणि उद्योगांसाठीचा व्यावसायिक (कमर्शियल) गॅस पुरवठा पूर्णपणे बंद केला आहे. हा सर्व साठा आता घरगुती ग्राहकांसाठी वळवण्यात आला आहे. कमर्शियल गॅस केवळ रुग्णालये, निवासी संस्था आणि आश्रमशाळा यांसारख्या अत्यावश्यक सेवांनाच पुरवला जाणार आहे, असे त्या म्हणाल्या.
लग्न समारंभ आणि कॅटरर्ससाठी सूचना
सध्या लग्नसराईचा हंगाम सुरू असल्याने कॅटरर्ससमोर अडचण निर्माण झाली आहे. ज्यांच्याकडे आधीचा कमर्शियल साठा शिल्लक आहे, ते आपले काम करू शकतात. मात्र, नव्याने व्यावसायिक बुकिंग घेतले जाणार नाही. यावर बोलताना चव्हाण यांनी मिश्किलपणे पण स्पष्टपणे सांगितले की, "ज्यांच्याकडे गॅसची सोय नाही, त्यांनी थोडंसं लग्न पुढे ढकललं तर काही हरकत नाही." तीन लोकप्रतिनिधींच्या घरातील मोठ्या लग्नांबाबत विचारले असता, त्यांच्याकडे आधीच कमर्शियल साठा उपलब्ध असल्याने ती लग्ने निर्विघ्न पार पडतील, असे त्यांनी स्पष्ट केले.
मुबलक साठा आणि बफर स्टॉक सज्ज
कोल्हापूर जिल्ह्याची दैनंदिन गरज साधारणतः 28 ते 29 हजार गॅस सिलिंडरची आहे. तिन्ही प्रमुख गॅस कंपन्यांकडून हा पुरवठा सध्या अत्यंत सुरळीतपणे सुरू आहे. विशेष म्हणजे, कोणत्याही आपत्कालीन स्थितीचा सामना करण्यासाठी कंपन्यांकडे 3 दिवसांचा अतिरिक्त 'बफर स्टॉक' राखीव ठेवण्यात आला आहे. त्यामुळे टंचाईची कोणतीही शक्यता सध्यातरी दिसत नाही, असे त्यांनी म्हटलं आहे.
बुकिंगमध्ये तांत्रिक अडथळे का?
मोहिनी चव्हाण यांनी सांगितलं की, अनेक ग्राहकांना सध्या ओटीपी (OTP) न येणे किंवा सॉफ्टवेअर हँग होणे अशा समस्या जाणवत आहेत. यावर स्पष्टीकरण देताना चव्हाण यांनी सांगितले की, "युद्धाच्या भीतीमुळे संपूर्ण भारतातून एकाच वेळी लोक मोठ्या प्रमाणावर बुकिंग करण्याचा प्रयत्न करत आहेत. यामुळे कंपन्यांच्या सर्व्हरवर प्रचंड ताण आला आहे. ही अडचण पूर्णपणे तांत्रिक आणि तात्पुरती असून नागरिकांनी संयम बाळगावा."
नियमांत बदल: आता 25 दिवसांनंतरच बुकिंग
परिस्थितीचे गांभीर्य ओळखून गॅस कंपन्यांनी खबरदारीचा उपाय म्हणून बुकिंगच्या मुदतीत बदल केला आहे. आता 21 दिवसांऐवजी 25 दिवसांनंतरच नवीन सिलिंडर बुक करता येईल. ग्रामीण भागात हाच नियम 45 दिवस करण्यात आला आहे. त्या म्हणाल्या की, "एका सामान्य कुटुंबाला एक सिलिंडर किमान 30 ते 32 दिवस पुरतो. 25 व्या दिवशी बुकिंग केले तरी पुढील 5-6 दिवसांत गॅस घरपोच मिळेल. त्यामुळे गॅस एजन्सीबाहेर रांगा लावण्याची कोणतीही आवश्यकता नाही," असे आवाहन प्रशासनातर्फे करण्यात आले आहे.
पाईपलाईन गॅस धारकांना इशारा
कोल्हापूर आणि इचलकरंजीमधील सुमारे 11 हजार घरांमध्ये पाईपलाईन गॅस सुविधा आहे. असे असतानाही अनेक ग्राहक जुने कनेक्शन असल्याचे सांगून विनाकारण सिलिंडरचे बुकिंग करत आहेत. अशा ग्राहकांचा डेटा गोळा करण्याचे काम प्रशासनाने सुरू केले असून, सिस्टीमवर विनाकारण ताण आणणाऱ्यांवर लक्ष ठेवले जात असल्याचेही त्या म्हणाल्या.
तक्रार कोणाकडे करावी?
- जर वारंवार प्रयत्न करूनही तांत्रिक कारणास्तव बुकिंग होत नसेल, तर नागरिकांनी घाबरून न जाता खालील माध्यमांशी संपर्क साधावा:
- गॅस कंपन्यांचे कस्टमर केअर (Customer Care)
- जिल्हा प्रशासन (पुरवठा विभाग)
- संबंधित कंपन्यांचे सेल्स ऑफिसर्स (Sales Officers)
इतर महत्वाच्या बातम्या
Before You Go
Umesh Tagunde Maharaj Pune Vastav 291 : महिला पाय धुवून पाणी पितात, पुण्याच्या बाबाचं वास्तव
महत्त्वाच्या बातम्या
