Jaykumar Gore Solapur Flood | सोलापूरात मोठं नुकसान, पालकमंत्री जयकुमार गोरेंनी घेतला आढावा

सोलापूर जिल्ह्यात मुसळधार पावसामुळे नदी-नाले ओसंडून वाहत आहेत. दक्षिण सोलापूर तालुक्यातील दुबदुबी तलाव ओव्हरफ्लो झाला आहे. यामुळे शिरवळ आणि जैनपूर भागातील शेतीत पाणी शिरले असून अनेक भागातील शेती पूर्णतः पाण्याखाली गेली आहे. मुसळधार पावसामुळे अनेक शेतकऱ्यांची पिके जमीनदोस्त झाली आहेत. सोलापूरच्या अनेक भागात पाणी साचल्याने शेतकरी हवालदिल झाले आहेत. सोलापूर जिल्ह्याचे पालकमंत्री जयकुमार गोरे यांनी पावसाच्या परिस्थितीचा आढावा घेतला. त्यांनी जिल्हाधिकारी आणि संबंधित अधिकाऱ्यांशी चर्चा केली. पावसामुळे झालेल्या नुकसानीसंदर्भात तात्काळ पंचनामे करण्याचे आणि बाधित शेतकऱ्यांना मदत करण्याचे आदेश दिले आहेत. सोलापूर शहर, मंगळवेढा आणि जिल्ह्यातील काही भागांमध्ये झालेल्या नुकसानीबाबत सकाळीच कलेक्टर आणि आयुक्तांशी बोलून तातडीने मदत करण्याच्या सूचना दिल्या आहेत. तसेच, सर्व नुकसानीचे पंचनामे करण्याच्या सूचनाही देण्यात आल्या आहेत.