Medical Negligence: 'डॉक्टर नव्हते, नर्सनेच डिलिव्हरी केली', पालघरमध्ये नवजात बाळाचा मृत्यू

पालघर (Palghar) जिल्ह्यातील मोखाडा (Mokhada) येथे आरोग्य विभागाचा धक्कादायक प्रकार समोर आला आहे, जिथे रुग्णालयाच्या हलगर्जीपणामुळे एका नवजात बालकाचा मृत्यू झाला. 'रुग्णालयामध्ये एकही वैद्यकीय अधिकारी उपस्थित नसल्यामुळे परिचारिकेकडूनच प्रसूती करण्यात आल्याचा' गंभीर आरोप महिलेच्या कुटुंबीयांनी केला आहे. वैशाली बात्रे (Vaishali Batre) या २५ वर्षीय महिलेला प्रसूतीसाठी रुग्णालयात दाखल केल्यानंतर तब्बल बारा तास वैद्यकीय अधिकाऱ्यांनी तिची देखभाल केली नाही. अखेरीस डॉक्टर उपस्थित नसल्याने एका नर्सनेच प्रसूती केली, ज्यात बाळाला जीव गमवावा लागला. या घटनेमुळे पालघरच्या ग्रामीण आणि आदिवासी भागातील आरोग्यसेवेचा प्रश्न पुन्हा एकदा ऐरणीवर आला आहे. रुग्णालयाने हे आरोप फेटाळले असून, डॉक्टर आपत्कालीन परिस्थितीत दुसऱ्या रुग्णावर उपचार करत होते, असे स्पष्टीकरण दिले आहे.