Maharashtra Power Strike | मेस्मा लागू तरी वीज कर्मचारी संपावर ठाम, राज्यासमोर वीज संकट

राज्यातील तीनही वीज कंपन्यांचे कर्मचारी आणि अधिकारी मध्यरात्रीपासून ७२ तासांच्या संपावर गेले आहेत. सरकारने मेस्मा लागू करत हा संप बेकायदेशीर ठरवला असला तरी, कर्मचारी आपल्या भूमिकेवर ठाम आहेत. 'मेस्मा जरी लागू केला असला तरी आम्ही त्याला घाबरत नाही' असे कर्मचाऱ्यांनी म्हटले आहे. खाजगी कंपन्यांना वीज वितरणाची समांतर जबाबदारी देण्याच्या प्रक्रियेला विरोध म्हणून हा संप पुकारण्यात आला आहे. सर्वोच्च पदावरील निवडक अधिकारी वगळता सुमारे ९० टक्क्यांहून अधिक अधिकारी-कर्मचारी संपावर सहभागी झाले आहेत. यामुळे पुढील तीन दिवस राज्यातील वीज यंत्रणेची जबाबदारी कंत्राटी कर्मचाऱ्यांवर असेल. सध्या अनेक जिल्ह्यांमध्ये वादळी वाऱ्यासह पाऊस पडत असल्याने, वीज यंत्रणेत बिघाड झाल्यास दुरुस्तीच्या कामात मोठी अडचण निर्माण होण्याची शक्यता आहे. नागपूरच्या कोराडी औष्णिक वीज प्रकल्पातील महानिर्मितीचे कर्मचारीही संपावर ठाम आहेत. यामुळे वीज निर्मिती, महापारेषण आणि महावितरण या तिन्ही क्षेत्रांसमोर मोठे आव्हान उभे राहिले आहे.