Mama Rajwade In BJP | ठाकरेंच्या शिवसेनेला नाशिकमध्ये मोठा धक्का, मामा राजवाडे BJP च्या वाटेवर

नाशिकमध्ये ठाकरे गटाच्या शिवसेनेला मोठा धक्का बसला आहे. ठाकरे गटाचे नवनियुक्त महानगरप्रमुख मामा राजवाडे हे भाजपमध्ये प्रवेश करण्याच्या तयारीत आहेत. त्यांच्यासोबत माजी नगरसेवक सीमा तारजणे, प्रशांत दिवे आणि कमलेश बोडके हे देखील आजच भाजपमध्ये दाखल होणार आहेत. तसेच, शिवसेना ठाकरे गटाचे उपनेते सुनील बागुल आणि त्यांचे चिरंजीव यांचाही भाजपमध्ये समावेश होण्याची शक्यता आहे. या पक्षप्रवेशांमुळे नाशिकमधील ठाकरे गटाची ताकद कमी होण्याची शक्यता वर्तवली जात आहे. मुंबईतील प्रदेश कार्यालयात सकाळी साडेदहा ते अकरा वाजता हे पक्षप्रवेश होणार होते, परंतु विधिमंडळाच्या कामकाजामुळे वेळ दुपारी दोन वाजेपर्यंत पुढे ढकलली जाऊ शकते. शरद पवारांच्या राष्ट्रवादी काँग्रेसचे गणेश गीते हे देखील आज भाजपमध्ये घरवापसी करणार आहेत. या पक्षप्रवेशांवरून खासदार संजय राऊत यांनी भाजपवर जोरदार हल्लाबोल केला आहे. राऊत यांनी एका पोस्टमध्ये म्हटले आहे की, "भारतीय जमवा जमवो पार्टीशी कमाल आहे। नाशिकमध्ये शिवसेना पदाधिकाऱ्यांवरती आधी खोटे गुन्हे दाखल केले. हे सर्व पदाधिकारी अटकपूर्व जामिनासाठी न्यायालयात गेले. पोलीस अटक करतील म्हणून हे सगळेजण फरार झाले. क्लाईमॅक्स असाच हे सगळे फरार, म्हणजेच भाजपसाठी गुन्हेगार आज भाजपमध्ये प्रवेश करतायत. जमवा जमवो पार्टीने महाराष्ट्राची वाट लावली आहे. सत्ता, पैसा दहशत दुसरं काही नाही." या प्रवेशांबाबत अत्यंत गुप्तता पाळण्यात आली होती. रात्री उशिरापर्यंत मुंबईत भाजपच्या प्रमुख पदाधिकाऱ्यांसोबत मंत्री गिरीश महाजन यांच्या उपस्थितीत खलबतं सुरू होती. मामा राजवाडे आणि सुनील बागुल यांच्यावर गुन्हे दाखल असून, पोलीस त्यांचा शोध घेत होते. त्यांचे फोनही स्विच ऑफ येत आहेत. या पार्श्वभूमीवर, गुन्हे दाखल झालेल्यांना पक्षात कसे घेतले जात आहे, असा प्रश्न उपस्थित होत आहे. प्रशांत दिवे यांनी भाजपमध्ये प्रवेश करण्यामागे विकासाचे काम हे कारण दिले आहे. केंद्र आणि राज्यातील भाजप सरकारची मदत विकासासाठी आवश्यक असल्याचे त्यांनी म्हटले आहे.