Maharashtra Cabinet Reshuffle | फडणवीस, अजित पवार, तटकरेंच्या बैठका; धनंजय मुंडेंच्या कमबॅकची चर्चा

राज्याच्या राजकारणात सध्या वेगवान घडामोडी घडत आहेत. उपमुख्यमंत्री एकनाथ शिंदेंच्या दिल्ली वारीनंतर, मुख्यमंत्री देवेंद्र फडणवीस आणि अजित पवार यांच्यात बैठकांचा सिलसिला सुरू आहे. काल मुख्यमंत्री फडणवीसांनी राज्यपालांची भेट घेतली होती. त्यानंतर आज सकाळी वर्षा निवासस्थानी मुख्यमंत्री आणि अजित पवार यांची भेट झाली. यानंतर पुन्हा फडणवीस, अजित पवार आणि सुनील तटकरे यांची सह्याद्री अतिथीगृहावर बैठक सुरू आहे. या बैठकीला धनंजय मुंडे यांनी देखील उपस्थिती दर्शवली होती. सलग दुसऱ्या दिवशी धनंजय मुंडे यांनी मुख्यमंत्र्यांची भेट घेतली आहे. धनंजय मुंडेंच्या मंत्रिमंडळात कमबॅकसाठी ही धडपड सुरू आहे का, अशी चर्चा राजकीय वर्तुळात सुरू आहे. सह्याद्रीवर अजित पवार आणि मुख्यमंत्री वेगवेगळ्या कक्षांमध्ये असल्याची शक्यता वर्तवली जात आहे, मात्र आतमध्ये नेमके काय चालले आहे, याबाबत उत्सुकता आहे. मालेगाव बॉम्बस्फोटावर मुख्यमंत्री प्रतिक्रिया देणार आहेत, तसेच या सर्व घडामोडींवरही ते बोलणार आहेत. मुंडेंच्या पत्नी आणि आमदार सुरेश धस यांनीही मुख्यमंत्र्यांची वर्षा निवासस्थानी भेट घेतली आहे.