Ganpati Special Trains | कोकण रेल्वेच्या Tejas आणि Vande Bharat मध्ये होणार मोदक वाटप!

आगामी गणेशोत्सवाच्या निमित्ताने कोकणवासियांचा आपापल्या गावासाठीचा प्रवास आणखी गोड करण्याची तयारी आयआरसीटीसीने केली आहे. त्यानुसार, २७ ऑगस्ट ते ६ सप्टेंबर या कालावधीत कोकण रेल्वे मार्गावर धावणाऱ्या तेजस आणि वंदे भारत एक्सप्रेसमध्ये मोदकांचं वाटप करण्याचा निर्णय घेण्यात आला आहे. हा उपक्रम कोकणात गणेशोत्सवासाठी जाणाऱ्या प्रवाशांसाठी विशेषतः राबवला जात आहे. गणेशोत्सव हा कोकणातील एक महत्त्वाचा सण असून, या काळात मोठ्या संख्येने लोक आपल्या मूळ गावी प्रवास करतात. प्रवाशांना सुखकर आणि आनंददायी प्रवास अनुभवता यावा, यासाठी रेल्वे प्रशासनाने हा निर्णय घेतला आहे. आयआरसीटीसीच्या पश्चिम विभागाकडून ही माहिती देण्यात आली आहे. या मोदक वाटपामुळे प्रवाशांना उत्सवाचा गोडवा प्रवासातच अनुभवता येईल.