Ashadhi Ekadashi: नरसी नामदेव येथे नामदेव महाराजांचं दर्शन घेण्यासाठी भाविकांची अलोट गर्दी

संत शिरोमणी नामदेव महाराज यांचे जन्मगाव असलेल्या हिंगोलीतील नरसी नामदेव येथे आषाढी एकादशीनिमित्त भाविकांची मोठी गर्दी झाली आहे. ज्या भाविकांना पंढरपूरवारीमध्ये सहभागी होता आले नाही, ते भाविक नामदेव महाराजांचे दर्शन घेण्यासाठी नरसी नामदेव येथे दाखल होत आहेत. पंढरपूरमध्ये ज्या प्रकारे गर्दी होते, त्याचप्रकारे नरसी नामदेव येथेही मोठ्या प्रमाणावर वारकऱ्यांची गर्दी पाहायला मिळत आहे. सकाळी सात वाजता प्रशासकीय पूजा झाल्यानंतर भाविकांना मंदिरात दर्शनासाठी प्रवेश देण्यात आला. त्यानंतर मोठ्या प्रमाणावर गर्दी उसळली आहे. संस्थानच्या वतीने चोख व्यवस्था करण्यात आली आहे. पोलीस बंदोबस्त आणि प्रशासनाच्या वतीने गर्दीची तारांबळ होऊ नये यासाठी सर्व व्यवस्था करण्यात आली आहे. साधारणतः एक ते दीड लाख वारकरी नामदेव महाराजांचे दर्शन घेतील अशी व्यवस्था करण्यात आली आहे. कुठलीही गर्दी न होता, कुठलीही तारांबळ न होता प्रत्येक वारकऱ्याचे दर्शन व्यवस्थित व्हावे यासाठी संस्थान समिती अलर्ट मोडवर आहे.