Salim Khan Threat : लॉरेन्स बिश्नोई को भेजू क्या? सलमान खानच्या वडिलांना भर रस्त्यात धमकी!

Salman Khan Father Saleem Khan Thereaten :  बॉलिवूडचा 'भाईजान' सलमान खान याच्या घराबाहेर एप्रिल महिन्यात गोळीबाराची घटना घडली होती. या घटनेने एकच खळबळ उडाली होती. त्यानंतर मुंबई पोलिसांनी वेगवान तपास करत आरोपींना अटक केली. आता, सलमान खानचे वडील आणि पटकथा लेखक सलीम खान यांना एका अज्ञात बुरखाधारी महिलेने गँगस्टर लॉरेन्स बिश्नोईच्या नावाने धमकी दिली आहे. सलीम खान हे मॉर्निंग वॉकला गेले असताना ही घटना घडली. या घटनेमुळे एकच खळबळ उडाली आहे. 

अभिनेता सलमान खानचे वडील सलीम खान हे  नेहमीच्या शिरस्त्याप्रमाणे बुधकारी सकाळी बँड स्टँड परिसरात मॉर्निंग वॉक साठी गेले होते. मॉर्निंग वॉक दरम्यान सलीम खान यांच्यासोबत त्यांचे चाहते,  गरजू व्यक्तीदेखील संवाद साधत असतात. काल (18 सप्टेंबर रोजी) एका दुचाकीवरून पुरुष आणि बुरखादारी महिला सलीम खान यांच्याजवळ आले. त्यावेळी महिलेने सलीम खान यांना उद्देशून लॉरेन्स बिश्नोई को भेजू क्या? असे म्हणत धमकी दिली आणि पोबारा केला. वांद्रे पोलिसांनी या धमकी प्रकरणाची गंभीर दखल घेतली आहे. या अज्ञात बुरखाधारी महिलेचा शोध घेण्यास पोलिसांनी सुरुवात केली आहे. पोलिसांनी त्यासाठी दोन पथके रवाना केली आहेत.