Thackeray Alliance | राज-उद्धव ठाकरे एकत्र, युती होणार की नाही? कार्यकर्त्यांमध्ये संभ्रम!

५ जुलै रोजी राज आणि उद्धव ठाकरे एकाच मंचावर एकत्र आले. यामुळे कार्यकर्ते आणि जनतेच्या आशा वाढल्या आहेत. मात्र, ठाकरे बंधूंचे पक्ष एकत्र येणार की नाही, हा प्रश्न अजूनही अनुत्तरित आहे. यामुळे महाराष्ट्र नवनिर्माण सेनेचे पदाधिकारी आणि कार्यकर्त्यांमध्ये संभ्रम निर्माण झाला आहे. राज ठाकरे यांनी प्रवक्ते आणि नेत्यांना जाहीरपणे न बोलण्याचे आदेश दिले आहेत. दुसरीकडे, मनसे नेत्यांनीही युतीसंदर्भात खुलेपणाने बोलणे टाळले. बाळा नांदगावकर यांनी "वेळ आली तर आपल्याला एकटेच आपण लढविण्याच्या भूमिकेमध्ये आहोत," असे म्हटले आहे. त्यांच्या या प्रतिक्रियेमुळे मनसे-सेना युतीसंदर्भातला संभ्रम आणखी वाढला आहे. तर, ठाकरे यांच्या शिवसेनेकडून युतीसाठी तयार असल्याचे आणि ती लवकरात लवकर व्हायला हवी अशा प्रतिक्रिया नेत्यांकडून येत आहेत. संदीप देशपांडे यांनी युतीबाबत प्रश्न विचारला असता माध्यमांना प्रतिक्रिया न देता ते निघून गेले. त्यामुळे युतीचे नेमके काय होणार, याची चर्चा सध्या सुरू आहे.