Wimbledon 2021 : विम्बल्डन 2021 मधील रॉजर फेडररचं आव्हान संपुष्टात; ग्रँडस्लॅम जेतेपदाचं स्वप्न भंगलं
Wimbledon 2021: टेनिस स्टार रॉजर फेडररचं विम्बल्डनमधील आव्हान संपुष्टात आलं असून पोलंडच्या हुबर्ट हुर्काझने फेडररचा पराभव करत उपांत्य फेरीत प्रवेश केला आहे.
Wimbledon 2021 : विम्बल्डन 2021 मध्ये बुधवारी टेनिस स्टार स्वित्झर्लंडच्या रॉजर फेडररला पुरुष एकेरी खुल्या टेनिस स्पर्धेत पराभवाचा सामना करावा लागला. पोलंडच्या हुबर्ट हुर्काझने फेडररचा 6-3, 6-4, 6-4 अशा सरळ सेटमध्ये पराभव केला. फेडरचा पराभव करुन हुर्काझने कारकीर्दीत पहिल्यांदाच ग्रँडस्लॅम स्पर्धेच्या उपांत्य फेरीत प्रवेश केला आहे.
पुढच्या महिन्यात वयाची चाळीशी गाठणारा फेडरर 21वा ग्रँडस्लॅम जेतेपदाचे स्वप्न घेऊनच मैदानावर उतरला होता. परंतु, संपूर्ण सामन्यात हुर्काझचंच वर्चस्व दिसून येत होतं. पोलंडच्या 24 वर्षांच्या हर्काझनं फेडररचा 6-3, 6-4, 6-4 अशा सरळ सेटमध्ये पराभव करत पहिल्यांदाच ग्रँडस्लॅम स्पर्धेच्या उपांत्य फेरीत प्रवेश केला आहे.
आठ वेळा विम्बल्डनच्या पुरुष एकेरी स्पर्धेचे जेतेपद मिळवणारा रॉजर फेडररला 24 वर्षीय हुर्काझ आदर्श मानतो. पण बुधवारी रंगलेल्या उपांत्यपूर्व सामन्यात हुर्काझने फेडररचा अवघ्या 1 तास 49 मिनिटांत पराभव केला. या पराभवामुळे रॉजर फेडरचे ग्रँडस्लॅम जेतेपदाचं स्वप्न भंगलं आहे. सामन्यात पराभव होऊनही चाहत्यांच्या आणि प्रेक्षकांच्या मनात रॉजरनं मानाचं स्थान पटकावल्याचा प्रत्यय कालच्या या सामन्यात आला. तसेच सोशल मीडियावरही चाहत्यांकडून फेडरर सामना हरल्याबाबत हळहळ व्यक्त होत होती. विम्बल्डनमधील शेवटचा सामना खेळल्याचे संकेत रॉजरनं दिल्याची शंका चाहत्यांकडून उपस्थित केली जात आहे. अशातच सामन्यासाठी सेंटर कोर्टवर उपस्थित असलेल्या चाहत्यांकडून फेडररच्या पराभवाबाबत हळहळ व्यक्त केली जात होती. तसेच त्याच्यावर कौतुकाचा वर्षावही होत होता. सामना संपल्यानंतर कोर्टवर उपस्थित असलेल्यांच्या टाळ्यांच्या कडकडाटात फेडरर बाहेर पडला.
जोकोविचचा दणदणीत विजय
जोकोविचनं ग्रँडस्लॅम स्पर्धामधील उपांत्यपूर्व फेरीचा सामना जिंकला आहे. हंगेरीच्या मार्टन फुक्सोविक्सचा जोकोविचनं 6-3, 6-4, 6-4 असा पराभव केला. जोकोविच दहाव्यांदा विम्बल्डनच्या उपांत्य फेरीत पोहोचला आहे. उपांत्य फेरीत जोकोव्हिच-शापोवालोव्ह आमने-सामने येणार आहेत.
महत्त्वाच्या इतर बातम्या :
महत्त्वाच्या बातम्या
ट्रेंडिंग न्यूज
