IPL 2023 : लिलावात अनसोल्ड राहिला, कॉमेंट्री केली आता मुंबईसाठी ठरतोय 'हुकुम का एक्का'
IPL 2023 : आतापर्यंत पीयूष चावला याने दमदार कामगिरी केली आहे. पीयूष चावला यंदाच्या हंगामात मुंबईचा सर्वाधिक यशस्वी गोलंदाज आहे.
Piyush Chawla In IPL 2023 : भारतीय लेग स्पिनर पीयूष चावला IPL 2023 च्या हंगामात मुंबई इंडियन्स संघाच्या ताफ्यात आहे. आतापर्यंत पीयूष चावला याने दमदार कामगिरी केली आहे. पीयूष चावला यंदाच्या हंगामात मुंबईचा सर्वाधिक यशस्वी गोलंदाज आहे. मुंबईसाठी त्याने सर्वाधिक विकेट घेतल्या आहेत. अनुभवी पीयुष चावला याला लिलावात कुणीही बोली लावायला तयार नव्हते. अशात मुंबईने पीयुष चावलावर विश्वास दाखवला.. मुंबईने पीयुष चावला याला 50 लाख रुपयांत आपल्या संघात घेतले. पीयूष चावला मुंबईचा यंदाच्या हंगामातील सर्वात यशस्वी गोलंदाज आहे. विकेट तर घेतोय... त्याशिवाय धावाही रोखतोय.
मुंबईसाठी चावलाचा भन्नाट शो -
34 वर्षीय पीयूष चावला याने मुंबईकडून दमदार कामगिरी केली आहे. २०२३ मध्ये झालेल्या लिलावात मुंबईने चावलाला अवघ्या पन्नास लाख रुपयांच्या मूळ किंमतीत खरेदी केले आहे. चावलाने यंदाच्या हंगामात नऊ सामने खेळले आहेत. १७ च्या सरासरीने त्याने १५ विकेट घेतल्या आहेत. मुंबईकडून सर्वाधिक विकेट घेणाऱ्या गोलंदाजात चावला प्रथम क्रमांकवर आहे. आयपीएलच्या हंगामात सर्वाधिक विकेट घेणाऱ्या गोलंदाजात चावला तिसऱ्या क्रमांकावर आहे. यंदाच्या हंगामात सर्वाधिक विकेट घेणाऱ्या गोलंदाजात शमी पहिल्या क्रमांकावर आहे. शमीने १७ विकेट घेतल्या आहेत.
कॉमेंट्री बॉक्समधून मैदानात पुनरागमन -
आयपीएल 2022 मध्ये कॉमेंट्री करणारा पीयूष चावला यंदाच्या हंगामात दमदार कामगिरी करत आहे. चावलने विकेट घेण्यासोबत धावाही रोखण्याचे काम केलेय. चावलाच्या नेतृत्वात मुंबईची फिरकी गोलंदाजी तगडी जाणवत आहे. अनुभवी चावलाकडून युवा खेळाडूंना शिकायला मिळत आहे. चावला याने यंदा प्रतिस्पर्धी फलंदाजांना रोखलेय. फक्त एका सामन्यात चावलाने ४० पेक्षा जास्त धावा खर्च केल्या आहेत. इतर सामन्यात त्याने कंजूष गोलंदाजी केली आहे. पंजाबविरोधात झालेल्या सामन्यात चावलाने चार षटकात २९ धावांच्या मोबदल्यात दोन विकेट घेतल्या.
याआधीही मुंबईच्या संघाचा भाग -
याआधीही पीयूष चावला मुंबईच्या संघाचा सदस्य होता. २०२१ च्या आयपीएल हंगामात मुंबईने चावलाला २.४० कोटी रुपयांत आपल्या ताफ्यात घेतले होते. पण त्याला फक्त एका सामन्यात संधी दिली होती. त्यावेळी चावलाने ३८ धावांच्या मोबदल्यात एक विकेट घेतली होती. त्यानंतर २०२२ मध्ये चावलाला खरेदीदार मिळाला नाही. त्यानंतर तो समालोचनासाठी गेला. पण २०२३ मध्ये चावला परतलाय. तो अधिक घातक झालाय.
आयपीएलमध्ये चावलाची कामगिरी -
पीयूष चावला याने २००८ मध्ये आयपीएलमध्ये पदार्पण केले होते. आतापर्यंत चावलाने १७४ सामने खेळले आहेत. चावलाच्या नावावर १७२ विकेटची नोंद आहे. आयपीएलमध्ये ३४८४ चेंडू टाकले असून त्याने ४५५६ धावा खर्च केल्या आहेत. १७ धावांच्या मोबदल्यात चार विकेट ही चावलाची आयपीएलमधील सर्वोच्च कामगिरी आहे.
महत्त्वाच्या बातम्या
