IPL : मुंबई इंडियन्स या तीन खेळाडूंना पुन्हा रिटेन करणार?

27 जानेवारीला आयपीएलच्या आगामी मोसमासाठी लिलाव होईल.

फाईल फोटो

मुंबई : आगामी आयपीएलच्या मोसमात मुंबई इंडियन्स कर्णधार रोहित शर्मा आणि पंड्या बंधू हार्दिक आणि क्रुणलला रिटेन करण्याची शक्यता आहे. तर दिल्ली डेअरडेव्हिल्स ऋषभ पंत आणि श्रेयस अय्यरला कायम करणार असल्याची माहिती आहे. 27 जानेवारीला आयपीएलच्या आगामी मोसमासाठी लिलाव होईल. खेळाडूंना रिटेन करण्याची अखेरची मुदत 4 जानेवारी आहे. मुंबई इंडियन्स रोहित शर्माला रिटेन करण्यासाठी उत्सुक असेल, कारण त्याच्या नेतृत्त्वात संघाने तीन आयपीएल ट्रॉफी जिंकल्या आहेत. हार्दिक पंड्या मॅच विनर खेळाडू आहे, तर तिसरा खेळाडू क्रुणाल असू शकतो, असं बीसीसीआयच्या एका अधिकाऱ्याने सांगितलं. इंडियन प्रीमिअर लीगमध्ये दोन वर्षांच्या बंदीनंतर चेन्नई सुपर किंग्जही पुनरागमनासाठी सज्ज झाली आहे. सीएसकेने महेंद्रसिंह धोनी, सुरेश रैना आणि रवींद्र जाडेजा यांनी रिटेन करण्याचा निर्णय घेतला आहे. फिरकीपटू रवीचंद्रन अश्विनबाबत अजून निर्णय झाला नसल्याची माहिती आहे. ''सीएसकेने आतापर्यंत लिस्ट सादर केलेली नाही, मात्र धोनी आणि रैनाला रिटेन करु हे वेगळं सांगायची गरज नाही. तिसरं नाव जाडेजाचं असू शकतं'', अशी माहिती सीएसकेच्या रणनितीची माहिती असलेल्या एका अधिकाऱ्याने दिली.