PBKS vs RCB IPL 2026 : प्लेऑफचं पहिली तिकीट बंगळुरूला! तर पंजाबच्या आशांवर बुलडोझर, पराभवाच्या षटकारानं श्रेयसच्या टीमचं टॉप-4चं समीकरण बिघडलं
Punjab Kings vs Royal Challengers Bengaluru IPL 2026 : आयपीएल 2026 च्या 61व्या सामन्यात रॉयल चॅलेंजर्स बंगळुरूने पंजाब किंग्सचा 23 धावांनी पराभव करत मोठा विजय मिळवला.
Punjab Kings vs Royal Challengers Bengaluru IPL 2026 : आयपीएल 2026 च्या 61व्या सामन्यात रॉयल चॅलेंजर्स बंगळुरूने पंजाब किंग्सचा 23 धावांनी पराभव करत मोठा विजय मिळवला. या हंगामातील RCBचा हा नववा विजय ठरला. पंजाबविरुद्धच्या या दमदार विजयासह बंगळुरूने अधिकृतपणे प्लेऑफमध्ये प्रवेश केला असून, आयपीएल 2026 च्या प्लेऑफसाठी पात्र ठरणारी ती पहिली टीम बनली आहे. दुसरीकडे पंजाब किंग्सला यंदाच्या मोसमातील सहाव्या पराभवाला सामोरं जावं लागलं असून, आता त्यांचं प्लेऑफमध्ये पोहोचणं अत्यंत कठीण झालं आहे. पंजाबच्या या पराभवामुळे प्लेऑफची शर्यत आणखी रंगतदार झाली आहे. या निकालाचा फायदा चेन्नई सुपर किंग्स, सनरायझर्स हैदराबाद आणि राजस्थान रॉयल्स या संघांना मोठ्या प्रमाणात होण्याची शक्यता आहे.
व्यंकटेश अय्यर अन् विराटची वादळी खेळी
प्रथम फलंदाजीसाठी उतरलेल्या आरसीबीची सुरुवात खराब झाली. सलामीवीर जेकब बेथेल 11 धावा करून बाद झाला. परंतु, त्यानंतर स्टार फलंदाज विराट कोहली आणि देवदत्त पडिक्कल यांनी डाव सावरला. विराटने 37 चेंडूंत 58 धावांची महत्त्वपूर्ण खेळी केली, ज्यात 4 चौकार आणि 3 षटकारांचा समावेश होता. पडिक्कलने 25 चेंडूंत 45 धावांचे योगदान दिले.
या दोघांनंतर मैदानात आलेल्या व्यंकटेश अय्यरने पंजाबच्या गोलंदाजांचा चांगलाच समाचार घेतला. व्यंकटेशने अवघ्या 40 चेंडूंत नाबाद 73 धावांची तुफानी खेळी केली. त्याने आपल्या खेळीत 8 चौकार आणि 4 षटकार ठोकले. डावाच्या अखेरीस टिम डेव्हिडने 12 चेंडूंत 28 धावा केल्या. आरसीबीने 20 षटकांत 4 बाद 222 धावांचा धावसंख्या उभारली. पंजाबकडून हरप्रीत ब्रारने 35 धावांत 2 विकेट्स घेतले, तर अर्शदीप आणि युझवेंद्र चहलला प्रत्येकी 1 बळी मिळाला.
पंजाब किंग्जची झुंज अपयशी; शशांक सिंगची अर्धशतकी खेळी
223 धावांच्या आव्हानाचा पाठलाग करताना पंजाब किंग्जची सुरुवात अत्यंत खराब झाली. सलामीवीर प्रियांश आर्या (0) आणि प्रभसिमरन सिंग (2) स्वस्तात बाद झाले. कर्णधार श्रेयस अय्यरही 1 धावेवर बाद झाल्याने पंजाबची स्थिती 3 बाद 19 अशी बिकट झाली होती.
यानंतर कूपर कॉनोली (37) आणि सूर्यांश शेंडगे (35) यांनी काही काळ डाव सावरण्याचा प्रयत्न केला. मात्र, मधल्या फळीत मार्कस स्टॉइनिस (37) आणि शशांक सिंग यांनी पंजाबच्या आशा जिवंत ठेवल्या. विशेषतः शशांक सिंगने आरसीबीच्या गोलंदाजांवर हल्ला चढवला. त्याने अवघ्या 27 चेंडूंत 4 चौकार आणि 4 षटकारांच्या मदतीने 56 धावांची धडाकेबाज खेळी केली. मात्र, रसिक सलाम दारने त्याला बाद करत पंजाबच्या विजयाच्या आशा संपुष्टात आणल्या. पंजाबचा संघ 20 षटकांत 8 बाद 199 धावांपर्यंतच मजल मारू शकला.
हे ही वाचा -
महत्त्वाच्या बातम्या
