FIFA World Cup 2026 : फुटबॉल विश्वाला हादरवणारा सलग दुसरा मृत्यू! आधी 25 वर्षांचा स्टार गेला, आता FIFA विश्वचषकातून हकालपट्टी झालेल्या रेफरीचा अचानक मृत्यू, नेमकं काय घडलं?
Dutch Referee Rob Dieperink Dies : फिफा विश्वचषक 2026 (FIFA World Cup 2026) दरम्यान फुटबॉल जगताला सलग दुसरा मोठा धक्का बसला आहे.
Dutch Referee Rob Dieperink Dies : फिफा विश्वचषक 2026 (FIFA World Cup 2026) दरम्यान फुटबॉल जगताला सलग दुसरा मोठा धक्का बसला आहे. काही दिवसांपूर्वीच दक्षिण आफ्रिकेचा 25 वर्षीय मिडफिल्डर जेडन ॲडम्स (Jayden Adams News) याचे अचानक निधन झाले होते, ज्याचा तपास सध्या पोलीस करत आहेत. या धक्क्यातून फुटबॉल जगत सावरत नाही तोच, विश्वचषकाच्या VAR टीममधून बाहेर करण्यात आलेले नेदरलँड्सचे रेफरी रॉब डीपरिंक यांचे वयाच्या 38 व्या वर्षी अचानक निधन झाल्याची धक्कादायक बातमी समोर आली आहे. विश्वचषक सुरू होण्यापूर्वीच डीपरिंक यांना संघातून हटवण्यात आले होते. त्यांच्यावर गंभीर आरोप झाले होते, मात्र नंतर पुराव्याअभावी ही केस बंद करण्यात आली होती. आता त्यांच्या अचानक जाण्याने फुटबॉल विश्वात पुन्हा एकदा शोककळा पसरली आहे.
कोण होते रॉब डीपरिंक? (Who was Rob Dieperink?)
रॉब डीपरिंक यांना 2026 च्या विश्वचषकात व्हिडिओ असिस्टंट रेफरी (VAR) ची महत्त्वाची जबाबदारी सोपवण्यात येणार होती. मात्र, स्पर्धा सुरू होण्याच्या साधारण एक महिना आधी त्यांना टीममधून काढून टाकण्यात आले. त्यांच्यावर एका अल्पवयीन मुलीचे लैंगिक शोषण केल्याचा आरोप झाला होता. परंतु, नंतर पुरेशा पुराव्यांभावी हे प्रकरण बंद करण्यात आले होते.
मृत्यूचे कारण अद्याप अस्पष्ट
वृत्तानुसार, रॉब डीपरिंक यांचे वयाच्या 38 व्या वर्षी निधन झाले, पण त्यांच्या मृत्यूचे नेमके कारण अद्याप जाहीर करण्यात आलेले नाही. नेदरलँड्स फुटबॉल असोसिएशनने अधिकृत निवेदन जारी करत त्यांच्या निधनाच्या बातमीला दुजोरा दिला असून त्यांना श्रद्धांजली वाहिली आहे. नेदरलँड्स फुटबॉल असोसिएशनने आपल्या निवेदनात म्हटले आहे की, "रॉब डीपरिंक यांच्या निधनाच्या बातमीने आम्हाला मोठा धक्का बसला असून आम्ही अत्यंत दुःखी आहोत. रॉब यांच्या रूपाने आम्ही केवळ एक आदरणीय रेफरीच नाही, तर एक दयाळू आणि समर्पित सहकारी गमावला आहे."
फिफाकडून (FIFA) शोक व्यक्त
जागतिक फुटबॉलची सर्वोच्च संस्था फिफानेही डीपरिंक यांच्या निधनावर तीव्र दुःख व्यक्त केले आहे. फिफाने त्यांच्या कुटुंबाप्रती आणि डच फुटबॉल असोसिएशनप्रती संवेदना प्रकट केल्या आहेत. फिफाने आपल्या निवेदनात म्हटले की, "संपूर्ण फुटबॉल समुदायाच्या वतीने आम्ही रॉब यांच्या कुटुंबीयांना, मित्रांना आणि डच फुटबॉल असोसिएशनला आमच्या संवेदना पाठवतो. ईश्वर त्यांच्या आत्म्यास शांती देवो."
विश्वचषकापूर्वी का करण्यात आले होते बाहेर?
रॉब डीपरिंक हे 2017 पासून नेदरलँड्सच्या एरेडिव्हिझी या सर्वोच्च फुटबॉल लीगमध्ये रेफरी म्हणून कार्यरत होते. त्यांनी युरो 2024 मध्येही VAR अधिकारी म्हणून कामगिरी बजावली होती. बीबीसीच्या वृत्तानुसार, फिफा विश्वचषक 2026 साठी VAR अधिकाऱ्यांच्या यादीत त्यांची निवड झाली होती, पण नंतर त्यांचे नाव वगळण्यात आले. लंडनच्या मेट्रोपॉलिटन पोलिसांनी अल्पवयीन मुलीच्या लैंगिक छळाच्या आरोपाखाली त्यांना अटक केल्यानंतर हा निर्णय घेण्यात आला होता. याच वादामुळे त्यांना विश्वचषकातील आपल्या भूमिकेला मुकावे लागले होते.
हे ही वाचा -
महत्त्वाच्या बातम्या
