Video: मालकीण प्रिती झिंटाने 'जादू की झप्पी' देताच अर्शदीपचं 'आनंद माझ्या पोटात मावेना'! थेट मैदानात बल्ले बल्ले, मोहम्मद शमी हसत हसत तोंडाकडं पाहतच राहिला
Preity Zinta Hug Arshdeep Singh: पंजाब किंग्सचा वेगवान गोलंदाज अर्शदीप सिंगलाही प्रीतीकडून एक खास भेट मिळाली आणि त्यांच्या सेलिब्रेशनचा व्हिडिओ व्हायरल होत आहे.
Preity Zinta Hug Arshdeep Singh: इंडियन प्रीमियर लीगमधील पंजाब किंग्स फ्रँचायझीची मालकीण असलेली अभिनेत्री प्रीती झिंटा वयाच्या पन्नाशीत सुद्धा सामन्यांदरम्यान तिच्या लूक आणि प्रतिक्रियांमुळे नेहमीच चर्चेत असते. तिचा संघ कसाही खेळला तरी, प्रीतीच्या चेहऱ्यावर नेहमीच हास्य असते. यामुळे तिला सोशल मीडियावर चाहत्यांचे प्रेम मिळाले आहे आणि त्या बदल्यात, प्रीती प्रत्येक सामन्यात प्रेक्षकांना फ्रँचायझी जर्सीचे वाटप करते. दरम्यान, पंजाब किंग्सचा वेगवान गोलंदाज अर्शदीप सिंगलाही प्रीतीकडून एक खास भेट मिळाली आणि त्यांच्या सेलिब्रेशनचा व्हिडिओ व्हायरल होत आहे. लखनौ सुपर जायंट्सकडून खेळणारा वेगवान गोलंदाज मोहम्मद शमी देखील त्या क्षणी उपस्थित होता, त्यामुळे त्यांची प्रतिक्रियाही कॅमेऱ्यात कैद झाली.
प्रीती झिंटाने अर्शदीपला मिठी मारली
19 एप्रिल रोजी, न्यू चंदीगड येथील महाराजा यादवेंद्र सिंग आंतरराष्ट्रीय स्टेडियमवर पंजाब किंग्सचा सामना लखनौ सुपर जायंट्सशी झाला. यजमान संघाने एकतर्फी विजय मिळवला. सामन्यानंतर प्रीती झिंटा देखील मैदानावर आली आणि तिने खेळाडूंचे अभिनंदन केले. यावेळी तिने अर्शदीपला मिठी मारली, ज्यानंतर त्या वेगवान गोलंदाजाने जणू काही बक्षीस मिळाल्याप्रमाणे जल्लोष केला. मोहम्मद शमीदेखील तिथे उभा होता. अर्शदीपची अशी प्रतिक्रिया पाहून शमीलाही हसू आवरले नाही. प्रीतीसुद्धा सतत हसत होती. सोशल मीडियावरील युझर्सना हा व्हिडिओ खूप आवडत आहे. एका युझरने तर असेही लिहिले आहे की, "शमी भाई आपल्या पाळीची वाट पाहत आहेत.
Arshdeep Singh’s priceless reaction after getting a hug from Preity Zinta, even Shami couldn’t control his laugh 🤣👌🏻
— Rohan💫 (@rohann__45) April 20, 2026
Bro was representing every PZ fanboy there 🔥 pic.twitter.com/7ZPT73X8G3
अर्शदीप सिंगचा फॉर्म परतला
अर्शदीप सिंगने आयपीएल 2026 मध्ये आपला फॉर्म परत मिळवला आहे. गुजरात टायटन्स, चेन्नई सुपर किंग्स आणि कोलकाता नाईट रायडर्सविरुद्धच्या पहिल्या तीन सामन्यांमध्ये त्याला एकही विकेट मिळाली नव्हती. मात्र, त्याने सनरायझर्स हैदराबादविरुद्ध दोन फलंदाजांना बाद केले. मुंबई इंडियन्सविरुद्ध त्याने 22 धावांत 3 बळी घेतले, त्यापैकी दोन बळी एकाच षटकात आले. त्यानंतर, लखनौ सुपर जायंट्सविरुद्धच्या सामन्यात त्याने एका फलंदाजाला बाद केले.
पंजाब विरुद्ध लखनौ सामन्यात काय घडलं?
पंजाब किंग्स विरुद्ध लखनौ सुपर जायंट्स सामन्यात ऋषभ पंतने नाणेफेक जिंकून किंग्सला प्रथम फलंदाजीसाठी आमंत्रित केले. प्रभसिमरन सिंग पहिल्याच चेंडूवर खाते न उघडता बाद झाला, पण त्यानंतर कूपर कॉन्ली आणि प्रियांश आर्या यांनी खेळपट्टीवर धुमाकूळ घातला. या दोन फलंदाजांनी 182 धावांची भागीदारी केली. प्रियांशने 37 चेंडूंमध्ये 9 षटकार आणि 4 चौकारांच्या मदतीने 93 धावा केल्या. दुसरीकडे, कॉन्लीने 46 चेंडूंमध्ये 87 धावांचे योगदान दिले, त्याच्या खेळीत 8 चौकार आणि 7 षटकारांचा समावेश होता. या दोघांच्या स्फोटक फलंदाजीमुळे पंजाबने 254 धावांचा डोंगर रचला. लखनौचा इतर कोणताही फलंदाज प्रभावी खेळी करू शकला नाही. मिचेल मार्श (40), आयुष बडोनी (35), ऋषभ पंत (43) आणि एडन मार्कराम (42) यांनी चांगली खेळी केली, पण त्यांची एकत्रित धावसंख्या केवळ 200 पर्यंतच पोहोचली. पंजाबने 54 धावांनी विजय मिळवला.
इतर महत्वाच्या बातम्या
महत्त्वाच्या बातम्या
