जॉन सिनाच्या इन्स्टाग्रामवर दलेर, सचिन, कपिल शर्माचे फोटो

जॉन सिनाच्या वेरिफाईड इन्स्टाग्राम अकाऊण्टवरुन सचिन तेंडुलकर, कपिल शर्मा आणि दलेर मेहंदी यांचे फोटो पोस्ट करण्यात आले आहेत

मुंबई : WWE स्टार जॉन सिनाचे चाहते जगभरात पसरले आहेत. पण जॉन सिना मास्टर ब्लास्टर सचिन तेंडुलकर, कॉमेडी किंग कपिल शर्मा आणि गायक दलेर मेहंदी यांचा चाहता आहे, असं समजलं तर? जॉन सिनाने इन्स्टाग्रामवर पोस्ट केलेले फोटो तसंच काहीसं सुचवत आहेत. जॉन सिनाच्या वेरिफाईड इन्स्टाग्राम अकाऊण्टवरुन सचिन तेंडुलकर, कपिल शर्मा आणि दलेर मेहंदी यांचे फोटो पोस्ट करण्यात आले आहेत. जॉन सिनाने त्याच्या बायोमध्ये 'फोटो कोणत्याही वर्णनाशिवाय पोस्ट केले जातील, तुम्हीच त्याचं कारण शोधा' असा इशारा दिला आहे. त्यामुळे जॉन सिना 'कहना क्या चाहते हो' असा प्रश्न फॅन्सना पडला आहे. दलेर मेहंदीने केशरी पगडी घातलेला फोटो दिसत आहे, तर कपिल शर्मा 'बाबाजी का ठुल्लू' ही त्याची प्रसिद्ध अॅक्शन करताना दिसत आहे. विश्वचषक जिंकल्यानंतर सचिन तिरंगा फडकवताना फोटोमध्ये दिसत आहे. त्यामुळे त्याचे फॉलोअर्स बुचकळ्यात पडले आहेत. याआधीही जॉन सिनाने कोड्यात टाकणारे फोटो शेअर केले आहेत. ट्विटरवरही यापूर्वी त्याने शाहरुख खानची प्रेरणादायी वक्तव्यं ट्वीट केली होती.