नीता अंबानी आशियातील सर्वात प्रभावशाली उद्योजिका

मुंबई : फोर्ब्स मॅग्झिनने आशियातील 50 सर्वात प्रभावशाली उद्योजिकांची यादी जारी केली आहे, ज्यात रिलायन्स फाऊंडेशनच्या प्रमुख नीता अंबानी सर्वोच्च स्थानावर आहेत. तर स्टेट बँक ऑफ इंडियाच्या संचालिका अरुंधती भट्टाचार्य या यादीत दुसऱ्या स्थानावर आहेत.   या यादीमध्ये 50 उद्योजिकांची नावं आहेत. महत्त्वाचं म्हणजे यामधील आठ भारतीय महिला आहेत. 2016 च्या आशियामधील 50 सर्वात प्रभावशाली उद्योजिकांच्या यादीत भारताशिवाय, चीन, इंडोनेशिया, ऑस्ट्रेलिया, व्हिएतनाम, थायलंड, हाँगकाँग, जपान, सिंगापूर, फिलीपाईन्स आणि न्यूझीलंडच्या महिलांचा समावेश आहे.   फोर्ब्सनुसार, "एक असा देश जिथे अब्जाधीशांच्या पत्नी पतीवर अवलंबून आहेत. पण रिलायन्समध्ये नीता अंबानी यांचा वाढता प्रभाव ही सामान्य गोष्ट नाही. यामुळेच यंदाच्या प्रभावशाली उद्योजिकांच्या यादीत नीता अंबानी अव्वल स्थानावर आहेत.   व्यवसायात महिला त्यांचं स्थान निर्माण करत आहेत. पण महिला आणि पुरुष यांच्यातील असामानता अजूनही कायम आहे, असंही या यादीत म्हटलं आहे."