Corona World Update | जगभरात कोरोनाचे जवळपास 17 लाख 80 हजार रुग्ण

जगभरात कोरोनाचा हाहाकार सुरुच असून आज कोरोनाबाधित रुग्णांची संख्या 17 लाख 80 हजार झाली आहे. तर कोरोनामुळे बळींची संख्या 1 लाख 8 हजारांवर पोहोचली आहे. दिलासादायक बाब म्हणजे चार लाख 3 हजार रुग्ण बरे झाले आहेत.

मुंबई : जगभरात कोरोनाचे जवळपास 17 लाख 80 हजार रुग्ण झाले आहेत. जगभरात कोरोनामुळे गेलेल्या बळींची संख्या 1 लाख 8 हजारांवर (10771) गेली आहे. तर चार लाख 3 हजार रुग्ण बरे झाले आहेत, अजून जवळपास 12 लाख 68 हजार लोक कोरोनाबाधित आहेत. त्यातील चार टक्के म्हणजे 50 हजार 590 गंभीर आहेत.

अमेरिकेने 20  हजार बळींचा आकडा ओलांडला

अमेरिकेत कोरोनाचा हाहाकार सुरुच आहे. अमेरिकेत 20 हजार बळींचा आकडा ओलांडला गेला आहे. गेल्या 24 तासात 1830 बळी अमेरिकेत गेले आहे. आता अमेरिकेत एकूण बळींची संख्या 20 हजार 577 वर पोहोचली आहे तर  रुग्णांची संख्या पाच लाख 33 हजारांवर गेली आहे.

न्यूयॉर्क प्रांतात काल 783 बळी, तिथे रुग्णांची संख्या1 लाख 81हजार तर एकूण मृतांचा आकडा 8627 इतका आहे.

त्या खालोखाल न्यूजर्सीत 2183, मिशिगन मध्ये 1392, लुझियाना 806, इलिनॉईस 677, कॅलिफोर्निया 630 आणि वॉशिंग्टनमध्ये 494 लोकांचा बळी या रोगाने घेतलाय.

गेल्या 11 दिवसात अमेरिकेने तब्बल 15 हजार 492 लोक गमावले.

 स्पेनमध्ये गेल्या चोवीस तासात ५२५ लोक गमावले आहेत. एकूण मृतांचा आकडा १६ हजार ६०६ वर पोहोचला आहे. गेल्या अकरा दिवसात स्पेनने ८ हजार १४२ लोकं गमावली आहेत.

तर काल इटलीत ६१९ माणसांचा बळी घेतला. आता इटलीतील एकूण बळींची संख्या १९ हजार ४६८ इतकी झाली आहे. काल रुग्णांची संख्या 7  हजार सातशेने वाढली,  इटलीत आता जवळपास १ लाख ५२ हजार रुग्ण आहेत. 

इंग्लंडमध्ये काल दिवसभरात ९१७ लोकांचा जीव गेला, तिथला बळीचा आकडा ९,८७५ वर पोहोचला आहे.

फ्रान्सने काल दिवसभरात ६३५ लोक गमावले. तिथे आत्तापर्यंत १३ हजार ८३२ बळी गेले आहेत तर एकूण रुग्ण १ लाख ३० हजारांच्या वर गेले आहेत.

जर्मनीत काल १३५ बळी गेले आहेत तर एकूण बळींची संख्या २,८७१ इतकी झाली आहे.

इराणमध्ये काल बळींच्या संख्येत काल १२५ ची भर पडली. इराणमध्ये एकूण ४,३५७ मृत्यू झाले असून रुग्णांची संख्या ७०,०२९ च्या वर पोहोचली आहे.

कोरोनाने बेल्जियममध्ये काल ३२७ मृत्यूमुखी पडले, एकूण बळींचा आकडा ३,३४६ वर पोहोचला आहे.

हॉलंडमध्ये काल १३२ बळी घेतले तिथे एकूण २,६४३ लोक दगावले आहेत.

टर्की ११०१,  ब्राझील ११४०, स्वित्झर्लंडने १,०३६, स्वीडनमध्ये ८८७, पोर्तुगाल ४७०, कॅनडात ६५३, इंडोनेशिया ३२७, तर इस्रायलमध्ये १०० बळी कोरोनामुळे गेले आहेत.

दक्षिण कोरियात  काल ३ मृतांची भर पडली, एकूण मृतांचा आकडा २११ वर पोहोचला आहे.

आपला शेजारी पाकिस्तानात रुग्णांची संख्या ५,०११ वर पोहोचली आहे, तिथे ८६ लोकांचा कोरोनाने बळी घेतला आहे.

गेल्या २४ तासात जगभरात कोरोनाच्या रुग्णांमध्ये ८०,२१८ तर बळींच्या आकड्यात  ६,०८३ ची भर पडली आहे.