Donald Trump : लाईट बंद करा अन् लाव रे तो व्हिडिओ! व्हाईट हाऊसमध्ये ट्रम्प आणखी एका राष्ट्राध्यक्षांना भिडले; राष्ट्राध्यक्ष म्हणाले, मला माफ करा, माझ्याकडे तुम्हाला भेट देण्यासाठी विमान नाही
दोन्ही नेत्यांमधील संभाषण सुरळीत चालू होते. अचानक ट्रम्प यांनी व्हिडिओ प्ले करण्यासाठी त्यांच्या कर्मचाऱ्यांना लाईट बंद करण्यास सांगितले. यामुळे रामाफोसा यांना धक्का बसला.
Donald Trump Vs Cyril Ramaphosa : युक्रेनचे राष्ट्राध्यक्ष झेलेन्स्की यांच्याशी झालेल्या जोरदार खडाजंगीनंतर व्हाईट हाऊसमध्ये पुन्हा एकदा राडा झाला. अमेरिकेचे राष्ट्राध्यक्ष डोनाल्ड ट्रम्प आणि दक्षिण आफ्रिकेचे अध्यक्ष सिरिल रामाफोसा (Donald Trump Vs Cyril Ramaphosa) यांच्यात भर पत्रकार परिषदेत जोरदार वाद झाला. ट्रम्प यांनी दक्षिण आफ्रिकेत गोरे शेतकऱ्यांचा नरसंहार होत असल्याचा आरोप केला. ओव्हल ऑफिसमधील बैठकीदरम्यान ट्रम्प यांनी पुरावा म्हणून लाईट बंद करून एक व्हिडिओ दाखवला आणि दावा केला की दक्षिण आफ्रिकेत गोरे लोक मोठ्या प्रमाणात लक्ष्य केले जात आहेत. यामुळे शेतकरी अमेरिकेकडे पळून जात आहेत. रामाफोसा यांनी याविरुद्ध कारवाई करावी.
सर्व वंशाचे लोक हिंसाचाराचा सामना करत आहेत
तथापि, रामाफोसा यांनी हे दावे फेटाळून लावले आणि नरसंहाराचे आरोप खोटे असल्याचे सांगितले. त्यांनी अमेरिकन राष्ट्राध्यक्षांना सांगितले की, दक्षिण आफ्रिकेत सर्व वंशाचे लोक हिंसाचाराचा सामना करत आहेत. त्यापैकी बहुतेक काळे आहेत. तिथे फक्त गोरे लोकांवरच अत्याचार होत नाहीत. ट्रम्प यांनी हे नाकारले आणि म्हणाले की फक्त 'गोरे शेतकरी'च छळले जात आहेत.
BREAKING: President Trump brings a TV into the Oval Office in front of the South African President and shows him a video of his own government calling for the genocide of white farmers.
— Collin Rugg (@CollinRugg) May 21, 2025
Savage.
"Turn the lights down. Turn the lights down and just put this on."
Cyril Ramaphosa… pic.twitter.com/wDRk76cC1x
मला माफ करा, माझ्याकडे तुम्हाला देण्यासाठी विमान नाही
यावेळी रामाफोसा यांनी कतार सरकारने ट्रम्प यांना भेट दिलेल्या विमानावरही टीका केली. ते म्हणाले की, मला माफ करा, माझ्याकडे तुम्हाला देण्यासाठी विमान नाही, ज्यावर ट्रम्प यांनीही त्याच पद्धतीने उत्तर दिले, ते म्हणाले, "जर तुमच्याकडे ते असते तर मी ते घेतले असते."
ट्रम्प आणि रामाफोसा यांच्यात वाद कसा सुरु झाला?
1. बैठक मैत्रीपूर्ण वातावरणात सुरू झाली
दोन्ही राष्ट्राध्यक्षांमधील बैठक मैत्रीपूर्ण वातावरणात सुरू झाली. दोघांनीही गोल्फबद्दल चर्चा केली. ट्रम्प यांनी आफ्रिकेत गोल्फ खेळणाऱ्या लोकांच्या प्रतिभेचे कौतुक केले. त्यानंतर दक्षिण आफ्रिकेचे अध्यक्ष रामाफोसा यांनी 'टी' हा शब्द वापरून दोन्ही देशांमधील व्यापारावर चर्चा करण्याचा प्रयत्न केला. त्यांनी खनिज कराराचाही उल्लेख केला.
2. ट्रम्प अचानक म्हणाले, लाईट बंद करा, व्हिडिओ प्ले करा
दोन्ही नेत्यांमधील संभाषण सुरळीत चालू होते. अचानक ट्रम्प यांनी व्हिडिओ प्ले करण्यासाठी त्यांच्या कर्मचाऱ्यांना लाईट बंद करण्यास सांगितले. यामुळे रामाफोसा यांना धक्का बसला.
3. रामाफोसा फक्त दोन-तीन वेळा व्हिडिओ पाहण्यासाठी मागे वळले
व्हिडिओ सुरू झाल्यावर रामाफोसा यांनी ट्रम्प यांना हातवारे करून विचारले की हे काय आहे? तथापि, ट्रम्प यांनी त्यांना वाट पाहण्याचा इशारा केला. रामाफोसा दोन-तीन वेळा मागे वळून व्हिडिओ पाहिला. ट्रम्प यांनी व्हिडिओला गोऱ्या लोकांच्या नरसंहाराचा पुरावा म्हटले आणि म्हटले की त्यात हजारो गोऱ्या शेतकऱ्यांच्या कबरी दिसतात.
4. रामाफोसा म्हणाले, व्हिडिओ कुठून आहे ते शोधून काढू
रामाफोसा यांनी संयम राखला आणि दाव्यांचे खंडन केले. ते म्हणाले की, मी हा व्हिडिओ यापूर्वी कधीही पाहिला नाही. हा व्हिडिओ कुठून आहे ते आम्ही शोधून काढू. आम्ही त्याची सत्यता सखोलपणे तपासू. रामाफोसा म्हणाले, "आपल्या देशात गुन्हेगारी आहे आणि प्रत्येकजण त्यावर परिणाम करतो, मग तो काळा असो वा गोरा"
5. ट्रम्प थांबले नाहीत, बातम्या दाखवून खून-खून म्हणू लागले
रामाफोसांच्या आश्वासनानंतरही ट्रम्प थांबले नाहीत. त्यांनी दक्षिण आफ्रिकेत मारल्या गेलेल्या गोऱ्या लोकांबद्दल उल्लेख असलेल्या बातम्यांच्या छापील प्रती दाखवल्या. पाने उलटत असताना ट्रम्प मोठ्याने खून...खून म्हणत राहिले.
रामाफोसा म्हणाले, दक्षिण आफ्रिकेत गोरे लोक अधिक आनंदी आहेत
हे संपल्यानंतर, रामाफोसा म्हणाले की व्हिडिओने त्यांच्या देशाचे संपूर्ण चित्र दाखवले नाही. ते म्हणाले की दक्षिण आफ्रिकेत अनेक राजकीय पक्ष आहेत. लोकशाहीने त्यांना त्यांचे मत बोलण्याची परवानगी दिली आहे. व्हिडिओमध्ये ते जे बोलत आहेत ते आपल्या सरकारच्या धोरणापेक्षा वेगळे आहे. रामाफोसा यांनी कबूल केले की त्यांच्या देशात खूप गुन्हे आहेत. पण तिथे फक्त गोरे लोकांवरच अत्याचार होतात असे त्यांना वाटत नव्हते. यावेळी त्यांनी नेल्सन मंडेला यांचाही उल्लेख केला आणि सांगितले की जेव्हा जेव्हा समस्या येते तेव्हा लोकांनी एकत्र बसून चर्चा करावी अशी त्यांची शिकवण होती. रामाफोसा पुढे म्हणाले की गोरे लोक मारले गेले आहेत परंतु पोलिसांच्या आकडेवारीवरून असे दिसून येत नाही की ते काळ्या लोकांपेक्षा जास्त धोक्यात आहेत. आफ्रिकन राष्ट्राध्यक्ष म्हणाले की त्यांच्या देशात आर्थिकदृष्ट्याही जवळजवळ प्रत्येक पातळीवर गोरे लोक काळ्या लोकांपेक्षा खूपच चांगल्या स्थितीत आहेत.
ट्रम्प जमीन अधिग्रहण कायद्याबद्दल संतापले
सिरिल रामाफोसा यांच्या स्वाक्षरीनंतर 9 ऑक्टोबर 2024 रोजी दक्षिण आफ्रिकेत भूसंपादन कायदा लागू झाला. या कायद्यानुसार, रस्ते, रुग्णालये किंवा शाळा बांधणे यासारख्या सार्वजनिक हितासाठी भरपाईशिवाय सरकार खासगी जमीन अधिग्रहित करू शकते. या कायद्याचा उद्देश दक्षिण आफ्रिकेच्या इतिहासात रंगभेदादरम्यान झालेल्या अन्यायाची दुरुस्ती करणे आहे. त्यावेळी काळ्या लोकांना त्यांच्या जमिनी काढून गरीब भागात पाठवण्यात आले होते. या कायद्याच्या अंमलबजावणीनंतर अमेरिकेचे अध्यक्ष ट्रम्प आणि टेस्लाचे प्रमुख मस्क खूप संतापले. ट्रम्प यांनी दावा केला की दक्षिण आफ्रिकेचे सरकार या कायद्याद्वारे लोकांच्या जमिनी जबरदस्तीने हिसकावून घेत आहे आणि गोऱ्या लोकांशी वाईट वागणूक देत आहे. या प्रकरणाची चौकशी होईपर्यंत त्यांनी दक्षिण आफ्रिकेला मिळणारी सर्व आर्थिक मदत थांबवण्याची धमकी दिली.
इतर महत्वाच्या बातम्या
महत्त्वाच्या बातम्या
