Solapur News: भाजपमध्ये मेगा भरती सुरू; सोलापुरातील चार माजी आमदार करणार भाजपप्रवेश; फडणवीसांच्या बंगल्यावर रात्री गुप्तं खलबतं
Solapur News: सोलापुरातील विविध पक्षातील अनेक दिग्गज नेत्यांचा लवकरच भाजपमध्ये प्रवेश होणार असल्याची माहिती समोर आली आहे.
सोलापूर : राज्यात स्थानिक स्वराज्य संस्थांच्या निवडणुका (Elections) लवकरच जाहीर होण्याची शक्यता असल्याने राजकीय हालचालींना वेग आला आहे. नेतेमंडळी आपल्या राजकीय गणितांनुसार आणि समीकरणांनुसार पक्षांतराची तयारी करत आहेत. आगामी महापालिका निवडणुकीच्या पार्श्वभूमीवर भाजपमध्ये (BJP) मेगा भरती सुरू झाली आहे. मोठ्या प्रमाणावर नेते, माजी नगरसेवक, माजी उपमहापौर, यांच्यासह काही दिग्गज नेत्यांना भाजपमध्ये (BJP) जाण्याचे वेध लागले आहेत. सोलापूरचे पालकमंत्री जयकुमार गोरे यांनी पुन्हा एकदा महापालिका आणि जिल्हा परिषद निवडणुकीपूर्वी मोठा धमाका केला असून काल रात्री जिल्ह्यातील चार माजी आमदारांची मुख्यमंत्र्यांसोबत वर्षावर बैठक झाल्याचे समोर आले आहे. हा धमाका करताना मित्रपक्ष असणाऱ्या अजित दादा गटालाही गोरे यांनी दे धक्का दिला असून दिवाळीपूर्वी किंवा दिवाळीमध्ये हा प्रवेश सोहळा करण्याच्या हालचाली वेगात सुरू आहेत. दरम्यान पालक मंत्री जयकुमार गोरे यांनी या वृत्ताला दुजोरा दिला असून जिल्ह्यातील अनेक बडे नेते भाजप प्रवेशाच्या वाटेवर असल्याचे संकेत दिले आहेत.
सोलापुरातील विविध पक्षातील अनेक दिग्गज नेत्यांचा लवकरच भाजपमध्ये (BJP) प्रवेश होणार असल्याची माहिती समोर आली आहे. माजी उपमहापौर पद्माकर काळे, माजी उपमहापौर दिलीप कोल्हे यांच्यासह अनेक माजी नगरसेवकांचा भाजपमध्ये (BJP) प्रवेश होणार आहे.
BJP: सुरेश पाटील, बिज्जू प्रधाने यांनी भाजपत घरवापसी केली
तर माजी सभागृह नेता सुरेश पाटील, बिज्जू प्रधाने यांनी भाजपत घरवापसी केली आहे. पालकमंत्री जयकुमार गोरे यांच्या नेतृत्वात या सर्व नेत्यांनी मुख्यमंत्री देवेंद्र फडणवीस यांची वर्षा निवासस्थानी भेट घेऊन सविस्तर चर्चा केली. त्यानंतर भाजप प्रदेशाध्यक्ष रवींद्र चव्हाण यांच्या उपस्थितीत सोलापुरातील या सर्व स्थानिक नेत्यांनी भाजपत प्रवेश केला आहे. या वेळी भाजप आमदार सचिन कल्याणशेट्टी, आमदार देवेंद्र कोठे, शहराध्यक्षा रोहिणी तडवळकर आणि महिला अध्यक्षा रंजीताताई चाकोते हे देखील उपस्थित होते.
BJP: काँग्रेसचे माजी आमदार दिलीप माने हे देखील भाजपच्या वाटेवर
या प्रवेश सोहळ्यात माजी नगरसेवक गुरुशांत धुत्तरगांवकर, माजी नगरसेवक सुभाष डांगे, माजी नगरसेवक मंदाकिनी तोडकरी, मारुती तोडकरी, माजी नगरसेवक कल्पना क्षीरसागर, नागनाथ क्षीरसागर, सुनील भोसले, बिपीन पाटील, मदन क्षीरसागर, रवी काळे, मेघराज कल्याणकर, बाळासाहेब तांबे आणि सुरेश तोडकरी या स्थानिक कार्यकर्त्यांनी भाजपात प्रवेश केला आहे. दरम्यान काँग्रेसचे माजी आमदार दिलीप माने हे देखील भाजपच्या वाटेवर असल्याच्या चर्चा आहेत. दिलीप माने यांनी देखील मुख्यमंत्री देवेंद्र फडणवीस यांची भेट घेतली असून लवकरच भाजपत प्रवेश करणार असल्याची सूत्रांची माहिती आहे.
BJP: चार माजी आमदार करणार प्रवेश; मुख्यमंत्र्यांसोबत रात्री वर्षावर झाली बैठक
काल रात्री वर्षावर मुख्यमंत्र्यांसोबत अजित पवार गटाचे माजी आमदार राजन पाटील, माजी आमदार यशवंत तात्या माने, माजी आमदार दिलीप माने आणि सध्या अमेरिकेत उपचार घेत असलेले माढ्याचे माजी आमदार पुत्र रणजीत शिंदे व विक्रम शिंदे हे मुख्यमंत्र्यांसोबत झालेल्या बैठकीस उपस्थित असल्याचे माहिती समोर येत आहे. पालकमंत्री जयकुमार गोरे यांनी मुख्यमंत्र्यांच्या दोन दिवसांपूर्वी झालेल्या दौऱ्यात याबाबत धमाके करण्याची तयारी केली होती. श्रीपुर येथील कार्यक्रमा दरम्यान मुख्यमंत्र्यांनी पालकमंत्र्यांना हिरवा कंदील दाखवल्यानंतर तातडीने काल रात्री मुंबईत मुख्यमंत्र्यांसमावेत ही मीटिंग घेण्यात आली.
पालकमंत्री जयकुमार गोरे यांनी महापालिका व जिल्हा परिषद निवडणूक डोळ्यासमोर ठेवून विरोधी पक्ष व मित्र पक्षांना अनेक धक्के देण्याची तयारी सुरू केली असून त्याचाच हा मोठा धमाका काल झाला आहे. याचा मोठा फायदा सोलापूर लोकसभेसह जिल्हा परिषद निवडणुकीत भाजपला मिळणार आहे. यापूर्वीच शिवसेना शिंदे गटाचे संपर्कप्रमुख प्राध्यापक शिवाजी सावंत यांनी भाजप प्रवेशाची तयारी सुरू केली असून दोन दिवसापूर्वी झालेल्या मुख्यमंत्र्यांच्या दौऱ्यात सोलापूर विमानतळावर मुख्यमंत्र्यांची त्यांनी भेट घेतली होती. यासोबत करमाळ्यातील शिवसेना शिंदे गटातून विधानसभा लढविलेले दिग्विजय बागल आणि सांगोला व पंढरपुरातील बडे नेतेही प्रवेशासाठी वेटिंगवर असल्याची माहिती समोर येत आहे.
महत्त्वाच्या बातम्या
