Solapur Cylinder Blast: सोलापूरमधील हॉटेलमध्ये सिलेंडरचा भीषण स्फोट, दोन चिमुरड्यांनी जागेवरच जीव सोडला, आई-वडीलही गंभीर जखमी

हॉटेलमध्ये रोजप्रमाणे खाद्यपदार्थ तयार केले जात होते. त्यावेळी गॅसच्या पाईपलाईनमधून गळती होत होती.

Solapur Accident

Source : ABPLIVE AI

Solapur:  घरगुती हॉटेलमध्ये गॅस सिलेंडरचा भीषण स्फोट झाल्याने दोन चिमुकल्या मुलींचा दुर्देवी मृत्यू झाल्याची धक्कादायक घटना मंगळवेढा तालुक्यातील नंदेश्वर गावात घडली आहे.  या स्फोटात दोन जण गंभीर जखमी झाले असून त्यांच्यावर सोलापूरमधील रुग्णालयात उपचार सुरू आहेत. श्रेया दादासाहेब गंगथडे, व स्वरा दादासाहेब गंगथडे ही मृत्यू झालेल्या मुलींची नावे आहेत. (Solapur Cylinder Blast)

नेमके घडले काय?

मंगळवेढा तालुक्यातील नंदेश्वर येथे एका छोट्या हॉटेलमध्ये खाद्यपदार्थ तयार करत असताना सिलेंडरचा भीषण स्फोट झाला. गॅस पाईप लिकेज असल्याने हा स्फोट झाल्याचं प्राथमिक तपासात समोर येत आहे. या भीषण दुर्घटनेत दोन चिमुकल्या मुलींचा मृत्यू झाला असून दादासाहेब व मोनाली गंगथडे हे गंभीर जखमी झाले आहेत. जखमींवर सोलापुरातील रुग्णालयात उपचार सुरू असून या घटनेची मंगळवेढा पोलीस ठाण्यात नोंद करण्यात आली आहे. घटनेचा पुढील तपास पोलीस करत आहेत.

मिळालेल्या प्राथमिक माहितीनुसार, हॉटेलमध्ये रोजप्रमाणे खाद्यपदार्थ तयार केले जात होते. त्यावेळी गॅसच्या पाईपलाईनमधून गळती होत होती. गळतीची वेळेवर कल्पना न आल्यामुळे अचानक मोठा स्फोट झाला. या स्फोटात श्रेया दादासाहेब गंगथडे आणि स्वरा दादासाहेब गंगथडे या दोन चिमुरड्यांचा जागीच मृत्यू झाला.

आईवडीलही गंभीर जखमी

या हृदयद्रावक घटनेत त्यांचे वडील दादासाहेब गंगथडे आणि आई मोनाली गंगथडे हे गंभीर जखमी झाले आहेत. त्यांच्यावर तातडीने सोलापूरच्या रुग्णालयात उपचार सुरू करण्यात आले आहेत. जखमींची प्रकृती चिंताजनक असून डॉक्टरांचे प्रयत्न सुरू आहेत. स्फोटाचा आवाज प्रचंड मोठा असल्याने संपूर्ण परिसर हादरला. आजूबाजूच्या नागरिकांनी घटनास्थळी धाव घेतली आणि जखमींना मदतीसाठी पुढे सरसावले. या प्रकरणी मंगळवेढा पोलिस ठाण्यात नोंद करण्यात आली असून, पोलिसांनी तपास सुरू केला आहे. गॅस पाईपलाईन लिकेजमुळेच स्फोट झाला की अन्य काही कारण होते, याचा तपास सुरू आहे.

हेही वाचा