Santosh Deshmukh : संतोष देशमुख हत्येची चौकशी CID पोलिस महासंचालक करणार, तपासाची कार्यकक्षा गृहविभाग ठरवणार
Santosh Deshmukh Murder Case : बीड हत्याकांडावर भाजपचे आमदार सुरेश धस यांनी विधानसभेमध्ये आवाज उठवला. या प्रकरणाची संपूर्ण कहाणी सांगत त्यांनी यामध्ये कुणाकुणाचा हात आहे त्यांची नावंही घेतली आहेत.
बीड : राज्यात गेल्या काही दिवसांपासून गाजत असलेल्या मस्साजोग सरपंच संतोष देशमुख हत्याप्रकरणी आता मोठी बातमी समोर आली आहे. या प्रकरणाचा तपास आता वरिष्ठ पातळीवर होणार आहे. या प्रकरणाची चौकशी करण्यासाठी सीआयडीचे पोलिस महासंचालकांच्या अध्यक्षतेखाली समिती गठीत करण्यात येणार आहे. या प्रकरणी मुख्यमंत्री देवेंद्र फडणवीस शुक्रवारी सकाळी 11 वाजता विधानसभेत सविस्तर निवेदन सादर करणार असल्याची माहिती आहे.
सरपंच संतोष देशमुख यांच्या हत्येप्रकरणी आता वरिष्ठ स्तरावरून चौकशी करण्यात येणार आहे. या प्रकरणी कोणते अधिकारी तपास करतील यावर गृहविभागाकडून निर्णय होणार आहे. तसेच या तपासाची कार्यकक्षा काय असणार हेदेखील गृह विभाग ठरवणार आहे.
मुंडेंचे निकटवर्तीय वाल्मिक कराड यांचे नाव
बीडमधील केज तालुक्यातील मस्साजोगचे सरपंच संतोष देशमुख यांची 9 डिसेंबर रोजी हत्या करण्यात आली होती. या प्रकरणी आतापर्यंत पाच आरोपींना अटक करण्यात आली आहे. तर इतर दोन आरोपी फरार आहेत. पवनचक्की खंडणी वादाप्रकरणी ही हत्या झाल्याची माहिती आहे. या प्रकरणी मुख्य आरोपी विष्णू चाटे, सुदर्शन घुले हे अजितदादांच्या राष्ट्रवादीशी संबंधित होते. त्यांच्यावर आता निलंबनाची कारवाई करण्यात आली आहे. तर या खंडणीप्रकरणी ज्या वाल्मिक कराड यांच्यावर गुन्हा दाखल करण्यात आला आहे ते राज्याचे मंत्री धनंजय मुंडे यांचे निकटवर्तीय आहेत.
बीडमधील या हत्याकांडावर भाजपचे आमदार सुरेश धस यांनी विधानसभेमध्ये आवाज उठवला. या प्रकरणाची संपूर्ण कहाणी सांगत त्यांनी यामध्ये कुणाकुणाचा हात आहे त्यांची नावंही घेतली. तसेच जोपर्यंत या प्रकरणी आरोपींचे कॉल रेकॉर्ड काढले जात नाहीत तोपर्यंत त्यांना आदेश देणारा मास्टरमाईंड समोर येणार नाही असं ते म्हणाले होते.
या प्रकरणी वाल्मिक कराड या व्यक्तीचा संबंध असून त्याला अटक करा अशी मागणी बीडचे आमदार संदीप क्षीरसागर यांनी केली. तर केजच्या आमदार नमिता मुंडदा यांनीदेखील या प्रकरणी आरोपींना अटक करावी अशी मागणी केली. रोहित पवार यांनीदेखील वाल्मिक कराड यांचे नाव घेऊन त्यांना अटक करा अशी मागणी केली. दुसरीकडे बीडचे खासदार बजरंग सोनावणे यांनी या प्रकरणी संसदेत आवाज उठवला.
वसुलीबाजांना सोडणार नाही, मुख्यमंत्र्यांचा इशारा
बीड प्रकरणी शुक्रवारी सकाळी 11 वाजता मुख्यमंत्री देवेंद्र फडणवीस हे सभागृहात निवेदन सादर करणार आहेत. राज्यातील एकाही वसुलीबाजाला सोडणार नाही असा इशारा त्यांनी गुरुवारी दिला. आता बीडच्या प्रकरणावर ते नेमकं काय बोलणार याकडे सर्वांचं लक्ष आहे.
ही बातमी वाचा:
महत्त्वाच्या बातम्या
