धूम्रपानासाठी रूम पार्टनरने जबरदस्ती केल्यामुळे तरुणाची गळफास घेऊन आत्महत्या

धूम्रपान करण्यासाठी रूम पार्टनरने तगादा लावला होता, म्हणून आत्महत्या करत असल्याचे सुसाईड नोटमध्ये लिहले आहे.

सांकेतिक छायाचित्र

पुणे : रूम पार्टनरने धूम्रपान (स्मोकिंग) करण्यासाठी तगादा लावल्यामुळे एका 18 वर्षीय तरुणाने गळफास घेऊन आत्महत्या केल्याची धक्कादायक घटना पुण्यातील कर्वेनगरमधील गुरुदत्त कॉलनीत घडली आहे. तरुणाच्या सुसाईड नोटमुळे संबंधित मित्राला वारजे पोलिसांनी अटक केली आहे. सागर अशोक पवार (वय 18) असे आत्महत्या केलेल्या तरुणाचे नाव आहे. याप्रकरणी पोलिसांनी लक्ष्मण वासुदेव पाटील (वय 30) याला अटक केली आहे.

पोलिसांनी दिलेल्या माहितीनुसार, सागरने नुकतेच बारावीचे शिक्षण पुर्ण केले होते. तो अनाथ असल्यामुळे आश्रमशाळेत शिक्षण घेत होता. शिक्षणानंतर मार्केटिंग क्षेत्रातील एका कंपनीत तो कामाला होता. तीन दिवसांपूर्वी तो कर्वेनगरमधील गुरुदत्त कॉलनीत राहायला आला होता. त्याच्यासोबत लक्ष्मण रुममेट म्हणून राहात होता. रुममेटबरोबर राहत असताना लक्ष्मणने सागरला सिगारेट ओढण्यासाठी तगादा लावला. मात्र, त्यास सागरने नकार दिला. त्यामुळे लक्ष्मणने त्याला मारण्याची धमकी दिली. त्याचा ताण आल्यामुळे सागरने गळफास घेऊन आत्महत्या केली.

आत्महत्या करण्यापूर्वी सागरने सुसाईड नोट लिहून ठेवली आहे. त्यानुसार लक्ष्मणने धूम्रपान करण्यासाठी तगादा लावला होता. जर धूम्रपान केले नाही, तर मारण्याची धमकी दिली होती. त्यामुळे आत्महत्या करीत असल्याचे सुसाईड नोटमध्ये नमूद करण्यात आले आहे.

Visakha Kale | आर्थिक चणचणीला कंटाळून प्रसिद्ध नृत्यांगना विशाखा काळेंची राहत्या घरी आत्महत्या