Pune Dog Park : श्वानप्रेमीसाठी आनंदाची बातमी; मुंबई आणि हैदराबादनंतर पुण्यातही साकारणार पहिलं 'Dog park'
पुण्यात मोठ्या प्रमाणात श्वानप्रेमी आहेत. याच श्वानप्रेमींसाठी महत्वाची आणि आनंदाची बातमी आहे. मुंबई आणि हैदराबाद डॉग पार्क नंतर आता पुण्यात शहरातील पहिलावहिला डॉग पार्क साकारण्याचा निर्णय घेतला आहे.
पुणे : पुण्यात मोठ्या प्रमाणात श्वानप्रेमी आहेत. याच श्वानप्रेमींसाठी महत्वाची आणि आनंदाची बातमी आहे. मुंबई आणि हैदराबाद डॉग पार्क (Dog Park) नंतर आता पुण्यात शहरातील पहिलावहिला डॉग पार्क साकारण्याचा निर्णय घेतला आहे. कात्रज-कोंढवा परिसरातील तीन एकर जागेत हे डॉग पार्क साकारण्यात येणार आहे.
श्वानप्रेमी पुणेकरांच्या अनेक तक्रारी आतापर्यंत येत होत्या शिवाय स्थानिक नागरिकांच्यादेखील अनेक तक्रारी पुढे येत होत्या. अनेकदा या तक्रारी वैयक्तिक पातळीवर न राहता पोलिसांपर्यंत गेल्या आहेत अनेकदा भांडणंदेखील झाली आहेत. श्वानप्रेमींना आपल्या लाडक्या श्वानांना बाहेर फिरायला नेताना अनेकदा श्वानप्रेमींना अन्य नागरिकांच्या रोषाला सामोरं जावं लागायचं. मात्र या डॉग पार्कमुळे आता बंदिस्त सुरक्षित जागेत त्यांना आपल्या श्वानांना मोकळेपणे खेळायला आणि त्याद्वारे व्यायामाची संधी मिळणार आहे. कात्रज-कोंढवा येथील फ्लायओव्हरच्या खाली अन्य कोणत्याही नागरी योजना नसल्याने ही जागा डॉग पार्कसाठी देण्यात आली आहे. या पार्कसाठी अंदाजे 1 ते 5 कोटी रुपयांचे बजेट मंजूर होण्याची शक्यता आहे.
पुणे शहराची लोकसंख्या जसजशी वाढत आहे, तशी प्राणीप्रेमी आणि श्वानपालकांचीही संख्या वाढत आहे. मात्र अन्य नागरिकांसाठी जसे बागा, उद्याने आणि ग्राऊंड राखीव ठेवण्यात येतात, तसे संपूर्ण शहरात एकही जागा नाही जिथे श्वानपालक आपल्या श्वानांना मोकळेपणे खेळायला सोडू शकतील. रस्त्यावरुन त्यांना फिरवताना अनेक नागरिक तक्रार करतात, तसेच त्यांच्या मल-मूत्राच्या दुर्गंधीचाही प्रश्न निर्माण होतो. यासाठी हे राखीव डॉग पार्क आवश्यक होते. येथे श्वानांसाठी अनेक खेळ आणि तसेच जलतरण तलावाचीही सोय करण्यात येणार आहे.
मुंबई आणि हैदराबाद येथील डॉग पार्कसाठी नाममात्र शुल्क आकारले जाते आणि त्यातूनच पार्कची देखभाल केली जाते. त्याच धर्तीवर पुणे महापालिकाही पार्कच्या शुल्कातून व्यवस्थापन खर्च भागवणार आहे. आजच्या घडीला पुण्यात सुमारे 8000 अधिकृत नोंदणी केलेले पाळीव श्वान आहेत. ज्यांनी नोंदणी केली नाही अशांची संख्या सुमारे 80 हजार ते एक लाखाच्या दरम्यान असल्याचा अंदाज आहे.
या पार्कमध्ये एक पशुवैद्यकीय विभाग तसेच ग्रूमिंग पार्लरदेखील असणार आहे. या दोन्ही सुविधा सशुल्क असतील. या पार्कमध्ये भटकी कुत्री प्रवेश करणार नाहीत, याचीही योग्य ती काळजी घेण्यात येईल. तसेच त्यांच्या नसबंदीची योजनाही सुरु राहिल. डॉग पार्कच्या जागेची नीट पाहणी करुन मगच त्याची निश्चिती करण्यात आली आहे.
इतर महत्वाच्या बातम्या-
महत्त्वाच्या बातम्या
