Maha Budget 2021 : अर्थसंकल्पातून अजित पवारांनी पुण्याला काय काय दिले?

कोरोना काळात राज्यातील अर्थव्यवस्थेला मोठा फटका बसला आहे. पुण्याचे पालकमंत्री असलेल्या अजित पवारांनी (Ajit Pawar) पुणे (Pune) जिल्ह्याला काय मिळणार याकडे सर्वांचे लक्ष लागले आहे.

पुणे : आज राज्याचा अर्थसंकल्प सादर केला आहे. महाविकास आघाडी सरकार सत्तेत आल्यानंतर हा सरकारचा दुसरा अर्थसंकल्प आहे. कोरोना काळात राज्यातील अर्थव्यवस्थेला मोठा फटका बसला आहे. पुण्याचे पालकमंत्री असलेल्या अजित पवारांनी पुणे जिल्ह्याला काय मिळणार याकडे सर्वांचे लक्ष लागले आहे. जगभरात सुरू असलेल्या कोरोनाच्या संकटामुळं अर्थव्यवस्था मोडकळीस आली आहे. देशात आणि त्यातही महाराष्ट्रात कोरोनाचा सर्वाधिक फटका बसला आहे.

कोरोना महामारीच्या संकटात आरोग्य अर्थसंकल्पात पुणे जिल्ह्यासाठी खालील तरतूदी करण्यात आल्या आहेत.

पुणे, नगर, नाशिक जलद रेल्वेला मंजुरी

पुणे-नगर-नाशिक दरम्यान 235 किमीचा रेल्वे मार्ग उभारण्यात येणार आहे. या पुणे-नाशिक रेल्वे मार्गासाठी 16 हजार 139 कोटी रूपयांची तरतूद करण्यात आली आहे.

ससून रुग्णालयाच्या बांधकामासाठी 28 कोटींची तरतूद

राज्यात 7जिल्ह्यांमध्ये नव्या वैद्यकीय महाविद्यालयांच्या स्थापनेची घोषणा अजित पवार यांनी केली. यामध्ये सिंधुदुर्ग, उस्मानाबाद, नाशिक, रायगड, सातारा, अमरावती आणि परभणी येथे नवीन शासकीय वैद्यकीय महाविद्यालय स्थापन केलं जाणार आहे. पुण्यातील ससून रुग्णालयातल्या वर्ग 4 मधील कर्मचाऱ्यांसाठी अनेक दिवसांपासून निवासस्थानाचा मुद्दा चर्चेत आला होता. या निवासस्थानांच्या बांधकामासाठी 28 कोटी 22 लाख अंदाजित खर्चाला मान्यता दिल्याची घोषणा केली.

पुण्यात आठ पदरी रिंग रोडची उभारणी (Pune Ring Road)

पुण्याबाहेरुन रिंग रोडची उभारणी काळाची गरज आहे. त्यासाठी 170 किमी लांबीच्या 26 हजार कोटी किमतीच्या आठ पदरी रिंग रोडचे करण्यात येईल. यासाठी भूसंपादनाचं काम याच वर्षी हाती घेण्यात येईल. या रिंग रोडमुळे पुण्यातील ट्रॅफिकची समस्या सुटू शकते, असं अजित पवार यांनी म्हटलं.

मुंबई-पुणे द्रुतगती मार्ग

मुंबई-पुणे द्रुतगती मार्गावर साडेदहा किलोमीट लांबीच्या दोन भुयारी मार्गाच्या, तसेच 2 किलोमीटर लांबीच्या 2 पुलांचा समावेश असलेल्या 6 हजार 695 कोटी रुपये किमतीच्या प्रकल्पांचे बांधकाम सुरु असून ते डिसेंबर 2022 पर्यंत पूर्ण करण्याचे नियोजन असल्याचे अजित पवार यांनी सांगितले.

पुण्यात आणखी एक विमानतळ

पुणे शहरात नवीन विमानतळ उभारण्यात येणार असल्याचं पवार म्हणाले. अर्थसंकल्प सादर करत असताना अजित पवार यांनी महत्त्वाची घोषणा केली.

पुण्यात आंतरराष्ट्रीय क्रीडा विद्यापीठ उभारणार

देशातील पहिले आंतरराष्ट्रीय क्रीडा विद्यापीठ राज्यात स्थापन करण्यात आले असून, त्याची घोषणा अजित पवार यांनी केली आहे. सध्या पुणे जिल्ह्यात बालेवाडी येथए क्रीडा संकुल सुरू आहे. या क्रीडा संकुलात विविध प्रकारच्या आंतरराष्ट्रीय दर्जाच्या क्रीडी सुविधा उपलब्ध करून देण्यात आल्या आहेत.

पाहा... राज्याचा अर्थसंकल्प लाईव्ह