व्यावसायिक गौतम पाषाणकर बेपत्ता प्रकरणात महत्त्वाचे धागेदोरे पोलिसांच्या हाती

21 ऑक्टोबरपासून बेपत्ता असलेले पुण्यातील प्रसिद्ध व्यवसायिक गौतम पाषाणकर (Gautam Pashankar) प्रकरणात पुणे पोलिसांच्या हाती महत्त्वाची माहिती लागली आहे. ते कोल्हापुरात गेल्याची माहिती पोलिसांना मिळाली आहे.

पुणे :  21 ऑक्टोबरपासून बेपत्ता असलेले पुण्यातील प्रसिद्ध व्यवसायिक गौतम पाषाणकर प्रकरणात पुणे पोलिसांच्या हाती महत्त्वाची माहिती लागली आहे. ते कोल्हापुरात गेल्याची माहिती पोलिसांना मिळाली आहे. गुन्हे शाखेच्या पोलिसांनी सीसीटीव्ही फुटेजगच्या माध्यमातून त्यांचा तपास सुरू केला असून त्यातून ही माहिती मिळाली. परंतु सध्याच्या परिस्थितीत ते कोल्हापुरातच आहे किंवा आणखी इतर कुठे गेलेत याचा शोध मात्र लागला नाही. गौतम पाषाणकर यांचं 21 ऑक्टोबरच्या आधीचं व्हॉट्सअपवरील चॅटिंग पोलिसांच्या हाती लागले आहे. त्याआधारे ही पोलिसांनी तपासाला सुरुवात केली आहे. लवकरच त्याचा शोध लागेल असे पोलिसांकडून सांगण्यात आले.

गौतम पाषाणकर यांचा मुलगा कपिल पाषाणकर यांनी सांगितले की, पुणे पोलिसांची सहा पथकं त्यांचा शोध घेत आहेत. कोल्हापूर, रत्नागिरी, सिंधुदुर्ग या भागातही पोलिसांची टीम तपासासाठी गेली होती. काही दिवसांपूर्वी गौतम पाषाणकर यांची ओळख पटवण्यासाठी पोलिसांनी मला एक सीसीटीव्ही फुटेज दाखवलं होतं. त्यामध्ये तेच होते. परंतु ते सीसीटीव्ही फुटेज कुठलं होतं याची माहिती पोलिसांनी दिली नाही. दिवाळीच्या आधी त्यांचा शोध लागेल आणि त्यांना घरी आणलं जाईल असं आश्वासन आम्हाला पोलिसांनी दिल्याचेही त्यांनी सांगितलं.

गौतम पाषाणकर हे त्यांना एका बड्या राजकीय नेत्याच्या जवळच्या व्यक्तीकडून त्रास दिला जात असल्यानं घर सोडून निघून गेल्याची दुसरी तक्रार पाषाणकर यांच्या कुटुंबियांकडून पोलिसांकडे देण्यात आली आहे. यामुळे बेपत्ता  व्यवसायिक गौतम पाषाणकर प्रकरणाला वेगळे वळण आले आहे.   पाषाणकर यांनी स्वतःच्या हाताने लिहिलेली तीन पानांची सुसाईड नोटही कुटुंबीयांनी पोलिसांकडे दिली होती. मात्र त्या सुसाईड नोटची तीन नाही तर चार पानं असून चौथ्या पानावर आर्थिक कारणांनी दिल्या जात असलेल्या त्रासामुळे आपण पुण्याच्या बाहेर निघून जात असल्याचं गौतम पाषाणकर यांनी लिहून ठेवलायचा दावा पाषाणकर यांचा मुलगा कपिल पाषाणकर यांनी केला होता. त्याचबरोबर या प्रकरणात पुणे पोलिसांवर दबाव असू शकतो असंही त्यांनी म्हटलं होतं.

पाषाणकर यांची गाड्यांची डीलरशीप, गॅस एजन्सी आणि इतरही अनेक व्यवसाय आहेत. बुधवारी (21 ऑक्टोबर) लोणी काळभोर इथल्या गॅस एजन्सीमधे जाऊन गौतम पाषाणकर हे शिवाजी नगर मधील त्यांच्या कार्यालयात परत आले. त्यानंतर त्यांनी त्यांच्या ड्रायव्हरकडे एक लिफाफा दिला आणि ड्रायव्हरला तो घरी द्यायला सांगितला. त्यानंतर गौतम पाषाणकर हे चालत पुणे विद्यापीठाच्या दिशेनं गेल्याचं सीसीटीव्ही फुटेजमध्ये दिसतं आहे. तेव्हापासून पाषाणकर बेपत्ता आहेत. पाषाणकर यांचं नक्की काय झालं याचा पोलिस तपास करत आहेत.

गौतम पाषाणकर हे कोणाला आढळल्यास त्यांनी कपिल पाषाणकर ( 9822474747) किंवा शिवाजीनगर पोलिस ठाणे (020-25536263) यांच्याशी संपर्क साधावा, असे आवाहन करण्यात आले आहे.