Malegaon Karkhana Election: माळेगाव कारखाना निवडणूक निकालाबाबत मोठी अपडेट, अजितदादांचा आणखी एक मोहरा आघाडीवर, तावरेंचं पॅनेल पिछाडीवर
Malegaon Karkhana Election: अजित पवार यांच्या नेतृत्वाखालील निळकंठेश्वर पॅनलच्या उमेदवारांनी पहिल्या फेरीत विजय मिळवला असल्याने पॅनलच्या विजयाचे संकेत मिळत आहेत. मात्र आता निवडणूक आणखी चूरशीची बनल्याचं दिसत आहे.
बारामती : राज्याचे लक्ष लागलेल्या माळेगाव सहकारी साखर कारखान्याच्या निवडणुकीसाठी (Malegaon factory election) आज सकाळपासून मतमोजणीला सुरुवात झाली असून, पहिला निकाल जाहीर झाला आहे. ब वर्ग सभासद प्रतिनिधी प्रवर्गातून निळकंठेश्वर पॅनलचे उमेदवार आणि राज्याचे उपमुख्यमंत्री अजित पवार (Ajit Pawar) हे विजयी झाले आहेत. या निवडणुकीकडे संपूर्ण राज्याचे लक्ष लागून होते, कारण ही केवळ स्थानिक साखर कारखान्याची निवडणूक नसून, ती पवार कुटुंबाच्या राजकीय वर्चस्वाशी जोडलेली मानली जात होती. अजित पवार (Ajit Pawar) यांच्या नेतृत्वाखालील निळकंठेश्वर पॅनलच्या उमेदवारांनी पहिल्या फेरीत विजय मिळवला असल्याने पॅनलच्या विजयाचे संकेत मिळत आहेत. मात्र आता निवडणूक आणखी चूरशीची बनल्याचं दिसत आहे.
आता अजित पवार पॅनेलचे रतनकुमार भोसले आघाडीवर असल्याचं दिसून येत आहे. चंद्रराव तावरे यांच्या पॅनेलचे बापूराव गायकवाड पिछाडीवर असल्याचं दिसून येत आहे. तर अनुसूचित जाती जमाती प्रवर्ग गटामधून रतनकुमार भोसले आघाडीवर आहेत. मतमोजणीला सुरुवात होताच सुरुवातीच्या टप्प्यांतच निळकंठेश्वर पॅनलने आघाडी घेतली होती. अजित पवारांच्या विजयामुळे त्यांच्या समर्थकांमध्ये उत्साहाचे वातावरण आहे. दरम्यान या निवडणुकीत अनेक नेते, स्थानिक कार्यकर्ते आणि शेतकरी वर्ग यांचे लक्ष लागून होते. साखर कारखान्याचे आर्थिक व सामाजिक महत्त्व पाहता, ही निवडणूक भविष्यातील राजकीय समीकरणांवर प्रभाव टाकणारी ठरण्याची शक्यता आहे. उर्वरित मतमोजणीमध्ये निळकंठेश्वर पॅनलला आणखी किती जागा मिळतात, याकडे आता साऱ्यांचे लक्ष लागले आहे.
अजित पवारांचा प्रचाराचा फळ?
उपमुख्यमंत्री अजित पवार यांनी ही निवडणूक जिंकण्यासाठी स्वतःच मोर्चा उघडला होता. गेले काही दिवस ते बारामतीत तळ ठोकून निवडणूक प्रचारात गुंतले होते. मतदानाच्या दिवशीही अजित पवार यांनी गावागावातील मतदान केंद्रांना भेटी देत स्थितीचा आढावा घेतला होता. या निवडणुकीत 85 वर्षीय चंद्राराव तावरे यांनी अजित पवारांना थेट आव्हान दिले आहे. तावरे हे माळेगाव साखर कारखान्याचे माजी अध्यक्ष असून, भाजपचे ज्येष्ठ आणि अनुभवी नेते मानले जातात. तावरे हे पूर्वी शरद पवारांचे विश्वासू सहकारी होते. या निवडणुकीत एकूण चार पॅनेल्स रिंगणात आहेत. शरद पवार गट, अजित पवार यांचे निळकंठेश्वर पॅनल, चंद्राराव तावरे यांचे पॅनल आणि शेतकरी संघटनांचे पॅनल. त्यामुळे लढत चुरशीची होणार, हे स्पष्ट आहे.या निकालाकडे संपूर्ण राज्याचे लक्ष लागले आहे. अजित पवारांच्या विजयाने निळकंठेश्वर पॅनलला सुरुवातीचा जोर मिळाला असला, तरी उर्वरित निकाल कशा दिशेने वळतात, हे पाहणे औत्सुक्याचे ठरणार आहे.
अजितदादांचा पहिला दणदणीत विजय
या निवडणुकीचा पहिला निकाल हाती आला असून ‘ब वर्ग गटातून’ उपमुख्यमंत्री अजित पवार हे विजयी झाले आहेत. 102 पैकी 101 मतं वैध होती, यातील अजित पवारांना 91 मतं मिळाली आहेत. सहकारी संस्था या गटासाठी मतदान करतात. यामध्ये अजित पवारांनी (Ajit Pawar) बाजी मारली आहे. अजित पवार यांचे निळकंठेश्वर पॅनल विरुद्ध चंद्रराव तावरे व रंजन तावरे यांच्या नेतृत्वाखालील सहकार बचाव पॅनलमध्ये मुख्य लढत होत असल्याचं चित्र आहे. बारामतीतील प्रशासकीय भवन मधील अभियांत्रिकी भवन येथे मतमोजणी सुरु आहे. माळेगाव सहकारी साखर कारखान्याच्या पंचवार्षिक निवडणुकीसाठी चौरंगी लढत झाली होती.
महत्त्वाच्या बातम्या
