Pune Accident News : भरधाव वेगाचे दोन बळी, नंबर प्लेट नसलेली पोर्शे अन् अल्पवयीन चालक, नियमांचे तीन तेरा पाहून पोलीस काय म्हणाले?
पुण्यात भरधाव वेगाने दोन आयटी इंजिनियरचा (Pune Accident News) बळी घेतला आहे. पोर्शे कारने दुचाकीला धडक दिल्याने दोन आय टी अभियंत्यांचा मृत्यू झाला. रात्री अडीचच्या सुमारास ही घटना घडली.
पुणे : पुण्यात भरधाव वेगाने दोन आयटी इंजिनियरचा (Pune Accident News) बळी घेतला आहे. पोर्शे कारने दुचाकीला धडक दिल्याने दोन आय टी अभियंत्यांचा मृत्यू झाला. रात्री अडीचच्या सुमारास ही घटना घडली. या अपघातानंतर पळून जाण्याचा प्रयत्न करणाऱ्या चालकाला जमावान चोप देऊन पोलिसांच्या हवाली केलं. या पोर्शे गाडीचा चालक पुण्यातील प्रसिद्ध बांधकाम व्यावसायिक आणि ब्रम्हा कॉर्पचे संचालक विशाल अग्रवाल यांच्या मुलगा आहे. तो सतरा वर्षाचा आहे. या संपूर्ण प्रकरणाची चौकशी करुन उशीरापर्यंत बार सुरु ठेवणाऱ्यांवर कारवाई करण्यात येईल आणि या अपघाताचा तपास मोठ्या स्तरावर केला जाईल, असं अतिरिक्त पोलीस आयुक्त मनोज पाटील यांनी एबीपी माझाशी बोलताना सांगितलं आहे.
हा संपूर्ण प्रकार थरकाप उडवणारा आहे. या प्रकरणी आम्ही 302 चा गुन्हा दाखल केला आहे. त्यासोबतच बाकी चौकशीदेखील करत आहोत. अल्पवयीन मुलाने मद्यपान केले आहे की नाही याची खातरजमा करण्यासाठी आम्ही त्याला वैद्यकीय तपासणीसाठी ताब्यात घेतले आहे. शिवाय त्याच्या गाडीवर नंबर प्लेट का नव्हती याचादेखील तपास करत आहोत. संपूर्ण प्रकरणाचा गांभीर्याने तापस केला जाईल, तपासात कोणतीही हयगय केली जाणार नसल्याचं ते म्हणाले.
हा सगळा प्रकार शनिवारी मध्यरात्री अडीच वाजताच्या सुमारास कल्याणीनगर जवळ घडला. मिळालेल्या माहितीनुसार, फिर्यादी हे त्यांच्या मित्रांच्या सोबत बॉलर हॉटेलमध्ये पार्टी करुन घरी परत जात होते. कल्याणीनगर-एअरपोर्ट रोडवर ग्रे कलरच्या गाडीने दोन्ही बाजूस नंबरप्लेट नसलेल्या कार चालकाने त्याच्या ताब्यातील चारचाकी गाडी हयगयीने, निष्काळजीपणाने, भरधाव वेगाने, बेदरकारपणे अनिस अवधिया याच्या दुचाकीला (एम.एच. 14 सी क्यु 3622) हिला पाठीमागून जोरात धडक दिली.या अपघातात अनिस अवधिया व मैत्रीण अश्विनी कोस्टा यांचा मृत्यू झाला. पोलीस पुढील तपास करत आहेत.
मृत्यू झालेला अनिस दोन दिवसांपूर्वीच बाहेरदेशातून पुण्यात परतला होता. पार्टीसाठी मैत्रीसोबत गेला आणि त्याचा अपघातात मृत्यू झाला. भरधाव चालक हा फक्त सतरा वर्षांचा आहे. त्यात परवाना नसताना तो पोर्शे गाडी भरधाव वेगाने चालवत होता. याच गाडीच्या धडकेत दोघांचा नाहक जीव गेला. त्यांच्या मृत्यूला जबाबदार कोण?, असा प्रश्न उपस्थित केला जात आहे.
महत्त्वाच्या बातम्या
