UP Assembly Election 2022 : योगी आदित्यनाथ यांना आणखी एक धक्का

UP Assembly Election 2022 : विधानसभा निवडणुकीपूर्वी मुख्यमंत्री योगी आदित्यनाथ यांना आणखी एक धक्का बसला आहे. मंत्रिमंडळातील आणखी एका मंत्र्याने आपला राजीनामा दिला आहे.

Yogi

UP Assembly Election 2022 : उत्तर प्रदेशसह इतर पाच राज्यांच्या निवडणुकांचं बिगुल वाजलं आहे. उत्तर प्रदेशकडे सर्व देशाचं लक्ष लागले आहे. विधानसभा निवडणुकीपूर्वी मुख्यमंत्री योगी आदित्यनाथ यांना आणखी एक धक्का बसला आहे. मंत्रिमंडळातील आणखी एका मंत्र्याने आपला राजीनामा दिला आहे.  स्वामी प्रसाद मौर्य यांच्यानंतर आता दारा सिंह चौहान (Dara Singh Chauhan) यांनीही मंत्रिपदाचा राजीनामा दिलाय. दारा सिंह चौहान मऊ जिल्ह्यातील मधुबन विधानसभा मतदार संघाचे आमदार आहेत. दारा सिंह चौहान यांनी राज्यपाल यांच्याकडे आपला राजीनामा दिलाय. यामध्ये भाजपवर आरोप अन्याय करण्यात आले आहेत.  दलित, मागास, शेतकरी, बेरोजगार युवक आणि व्यापाऱ्यांची घोर उपेक्षा झाल्यामुळे मी योगी मंत्रिमंडळातून राजीनामा देत असल्याचं त्यांनी म्हटलं आहे. 

योगी आदित्यनाथ यांच्या मंत्रिमंडळात मंत्री असलेले दारा सिंह चौहान (Dara Singh Chauhan) यांनीही मंत्रिपदाचा राजीनामा दिलाय. चौहान यांच्या राजीनाम्यानंतर उत्तर प्रदेशचे उप मुख्यमंत्री आणि भाजपचे ज्येष्ठ नेते केशव प्रसाद मौर्य (Keshav Prasad Maurya) यांनी ट्वीट करत फेरविचार करण्याचं आवाहन केलं आहे. दरम्यान, याआधी स्वामी प्रसाद मौर्य यांनी आपल्या मंत्रिपदाचा राजीनामा दिला होता. त्यांनी भाजप पक्षाचाही राजीनामा दिला असून ते आता समाजवादी पक्षामध्ये प्रवेश करणार आहेत. स्वामी प्रसाद मौर्य यांच्यासोबत तीन आमदारांनीही राजीनामा दिला होता. त्यानंतर आज आणखी एका नेत्याने राजीनामा दिलाय.  
 

दारा सिंह चौहान (Dara Singh Chauhan) बसपा आणि सपा या पक्षाचे सदस्यही राहिलेले आहेत. बसपामधून विधानपरिषदेचे आमदार राहिले होते, त्यानंतर राज्यसभेतही गेले होते.  त्यानंतर बसपा सोडून सपामध्ये दाखल झाले होते. सपामध्ये घोसी येथून खासदार म्हणून निवडूण आले होते. 2014 मध्ये पराभव झाला होता. त्यानंतर 2017 मध्ये भाजपमध्ये प्रवेश केला होता. मऊ जिल्ह्यातील मधुबन येथील मतदार संघात आमदार झाले, त्यांना मंत्रिपदही मिळाले.  

उत्तर प्रदेशमध्ये जातीय समीकरणाला महत्व
उत्तर प्रदेशच्या निवडणुकांमध्ये महाराष्ट्राइतकंच जातीय समीकरणांचं महत्व आहे. तिथं ओबीसी समाजाचं अनेक मतदारसंघांमध्ये वर्चस्व आहे. तर काही मतदारसंघांमध्ये याच मतदारांची संख्या मोठी आहे. त्यामुळे स्वामी प्रसाद मौर्य यांचं जाण्यानं भाजपला फटका बसणार की मोदी-योगींच्या झंझावातासमोर त्याचा काहीही परिणाम होणार नाही हे 10 मार्चलाच कळेल.