Eknath Shinde On Sanjay Gaikwad: पोलिसांवर आक्षेपार्ह विधान करणाऱ्या संजय गायकवाडांना एकनाथ शिंदेंनी दिली समज; तीव्र शब्दात व्यक्त केली नाराजी
Eknath Shinde On Sanjay Gaikwad: पोलिसांबद्दल केलेल्या वादग्रस्त विधानाबद्दल एकनाथ शिंदे यांनी संजय गायकवाड यांच्यावर तीव्र शब्दात नाराजी व्यक्त केली आहे.
Eknath Shinde On Sanjay Gaikwad: महाराष्ट्र पोलिसांसारखं अकार्यक्षम डिपार्टमेंट जगात कुठेही नाही. पोलिसांनी जर 50 लाख पकडले तर ते 50 हजार दाखवतात, असं विधान शिवसेना शिंदे गटाचे आमदार संजय गायकवाड (Sanjay Gaikwad) यांनी केलं होतं. या वक्तव्याप्रकरणी त्यांच्यावर गुन्हा देखील दाखल करण्यात आल आहे. संजय गायकवाडांच्या या विधानानंतर विविध चर्चांना उधाण आले होते. अनेक राजकीय नेत्यांनी देखील यावर प्रतिक्रिया दिली. आता या संदर्भात संजय गायकवाड यांना उपमुख्यमंत्री एकनाथ शिंदे (Eknath Shinde) यांनी फोनकरून समज दिल्याची माहिती समोर आली आहे.
पोलिसांबद्दल केलेल्या वादग्रस्त विधानाबद्दल एकनाथ शिंदे यांनी संजय गायकवाड यांच्यावर तीव्र शब्दात नाराजी व्यक्त केली आहे. अशा पध्दतीची आक्षेपार्ह विधानं लोकप्रतिनधींच्या तोंडी शोभत नाही. त्यामुळे यापुढे बोलताना काळजी घ्या, अशा शब्दात एकनाथ शिंदे यांनी संजय गायकवाड यांना समज दिली आहे. काही पोलिसांनी आक्षेपार्ह वर्तन केले म्हणून संपूर्ण पोलीस यंत्रणेला दोष देणं अत्यंत चुकीचं आहे. महाराष्ट्र पोलीस दल हे त्याग आणि शौर्याचं प्रतिक आहे. 26/11 चा हल्ला असो किंवा राज्यातील कायदा सुव्यवस्था राखणे असो...पोलीस दल आहे म्हणून आपण सर्वजण सुरक्षित आहोत. पोलीस सर्वकाही विसरून रात्रंदिवस काम करतात, म्हणून आपण आनंदाने सण-उत्सव साजरे करू शकतो, असं एकनाथ शिंदेंनी सांगितले.
सरसकट पोलिसांना दोषी ठरवणं अत्यंत चूकीचं- एकनाथ शिंदे
तुमच्या काही पोलिसांबद्दल तक्रारी असतील तर तुम्ही मुख्यमंत्री देवेंद्र फडणवीस यांच्याकडे किंवा माझ्याकडे दाद मागू शकता, असं एकनाथ शिंदे यांनी संजय गायकवाड यांना सांगितले. मीडीयासमोर जाऊन सरसकट पोलिसांना दोषी ठरवणं अत्यंत चूकीचं आहे. लोकप्रतिनिधींना अशा पध्दतीनं बोलणं मुळीच शोभत नाही. त्यामुळे पोलिसांची प्रतिमा मलिन होते. पोलिसांचं खच्चीकरणही होऊ शकतं. वर्दीचा मान प्रत्येकाने राखलाच पाहिजे. त्यामुळे यापुढे अशा पध्दतीने विधानं होणार नाहीत याची काळजी घ्या, असं म्हणत एकनाथ शिंदे यांनी संजय गायकवाडांना बजावले आहे.
एकनाथ शिंदे आज बुलढाणा दौऱ्यावर-
एकनाथ शिंदे आज बुलढाणा येथे आभार दौऱ्यावर आहेत. गेल्या लोकसभा आणि विधानसभा निवडणुकीत कार्यकर्त्यांनी केलेल्या मेहनतीमुळे जिल्ह्यात खासदार प्रतापराव जाधव व आमदार संजय गायकवाड हे निवडणुकीत विजयी झाले. त्यामुळे कार्यकर्त्यांचे आभार मानण्यासाठी एकनाथ शिंदे आज आभार यात्रा दौऱ्यावर बुलढाण्यात आहे. बुलढाण्यात ते एक सभा घेऊन कार्यकर्त्यांशी संवाद साधणार आहेत.खरंतर एकनाथ शिंदे यांच्या दौऱ्यावर काँग्रेस प्रदेशाध्यक्ष हर्षवर्धन सपकाळ व ठाकरेंच्या शिवसेनेने सुद्धा टीका केली आहे. तसेच शिंदे यांच्या शिवसेनेचे बुलढाण्याचे आमदार संजय गायकवाड यांनी पोलिसांवर केलेल्या टीकेमुळे काल त्यांच्यावर गुन्हाही दाखल झालाय. या पार्श्वभूमीवर उपमुख्यमंत्री एकनाथ शिंदे आज बुलढाण्यात काय बोलणार याकडे सर्वांचे लक्ष लागून आहे.
पोलिसांबद्दल आक्षेपार्ह वक्तव्य करणं संजय गायकवाडांना भोवलं, VIDEO:
संबंधित बातमी:
महत्त्वाच्या बातम्या
