Amol Mitkari : रोहित पवारांना मुख्यमंत्री व्हायचंय, पण जयंत पाटील त्यांचा टप्प्यात कार्यक्रम करणार : अमोल मिटकरी

Amol Mitkari : आधी अजितदादा पक्षात असताना त्यांना त्रास द्यायचा कार्यक्रम केला, आता जयंत पाटील अडसर ठरतात हे समजल्यावर त्यांना बाजूला करण्याचं कारस्थान रोहित पवार करत असल्याचा आरोप अमोल मिटकरी यांनी केला. 

Amol Mitkari Vs Rohit Pawar

अकोला : राष्ट्रवादी काँग्रेस शरद पवार गटातील जयंत पाटील विरूद्ध रोहित पवार (Jayant Patil Vs Rohit Pawar) असा वाद असून रोहित पवारांना मुख्यमंत्री व्हायचं असल्याने ते जयंत पाटलांना बाजूला सारण्याचं काम करत असल्याचा आरोप अजित पवार गटाचे प्रवक्ते आणि आमदार अमोल मिटकरी (Amol Mitkari) यांनी केला. राष्ट्रवादीच्या उभारणीत जयंत पाटील यांचा मोठा हात असून ते रोहित पवारांचा टप्प्यात घेऊन कार्यक्रम करणार असल्याचंही मिटकरी म्हणाले. 

रोहित पवार हे आयत्या पिठावर रेघोट्या ओढणारे आहेत, त्यांना मुख्यमंत्री व्हायचं असल्याने आधी अजितदादा आणि आता जयंत पाटलांना बाजूला सारण्याचं काम करत असल्याची टीका अमोल मिटकरी यांनी केली. 

रोहित पवारांवर टीका करताना अमोल मिटकरी म्हणाले की, जयंत पाटलांचे राष्ट्रवादी उभारण्यामागे वाटा आहे. हा नव्याने आलेला नवखा युवक पहिल्यांदा आमदार झाला. लोकसभेच्या निवडणुकीत शरद पवार आणि जयंत पाटलांचं मोठं योगदान आहे. जयंत पाटील हे राष्ट्रवादीचे पिलर आहेत. रोहित पवारांनी ट्विटरवर टिवटिव करण्यापेक्षा पवारांना सांगावं. 

जयंत पाटील टप्प्यात कार्यक्रम करणार

रोहित पवारांना मुख्यमंत्री व्हायचं आहे म्हणून हे सर्व सुरू असल्याचा आरोप करत अमोल मिटकरी म्हणाले की, अजितदादा असतानाही असाच प्रयत्न सुरू होता. अजितदादांनी पवारसाहेबांकडे वेगळं काही मागितलं नव्हतं, पक्षाची जबाबदारी मागितली होती. रोहित पवारांना अजितदादांची जागा घ्यायची होती. जयंत पाटील आता त्यामध्ये अडसर ठरत असल्याने त्यांना बाहेर काढण्याचं काम सुरू आहे. रोहित पवारांना पक्ष ताब्यात घ्यायचा आहे. म्हणून आता जयंत पाटलांचा अपमान करायचा आहे. पण जयंत पाटील याचा टप्प्यात कार्यक्रम वाजवणार. 

रोहित पवारांना मुख्यमंत्री होण्याची घाई झाली आहे. अहिल्यानगरच्या मेळाव्यात त्यांनी जयंत पाटलांच्या विरोधात वक्तव्य केलं. रोहित पवार आता वैफल्यग्रस्त झाले आहेत. त्यांना आता काही कामधंदा राहिला नाही. विधानसभा तोंडावर आली असल्याने बालिश चाळे सुरू आहेत. उगाच हिरोगिरी करायची आणि हिरो व्हायचं काम सुरू आहे. 

भुजबळ नाराज नाहीत

सुनेत्रा पवारांना राज्यसभेवर पाठवल्यानंतर छगन भुजबळ नाराज नसल्याचं अमोल मिटकरी म्हणाले. ते म्हणाले की, हा निर्णय सर्वानुमते झाला असून भुजबळांचीही त्याला मान्यता मिळाली. भुजबळ नाराज असते तर त्यांनी सांगितलं असतं. 

ही बातमी वाचा: