नाशिकचे आयुक्त डॉ. प्रवीण गेडाम यांची बदली, अभिषेक कृष्णा नवे आयुक्त

नाशिक: डॉ. प्रवीण गेडाम यांची नाशिक महापालिकेच्या आयुक्त पदावरून तडकाफडकी बदली करण्यात आली आहे. राज्य सरकारच्या या कृतीचा महाराष्ट्र नवनिर्माण सेना कडक शब्दांत निषेध व्यक्त केला आहे.   मराठी माणसाला भूलथापा देत सत्तेत आलेल्या भाजप-सेना सरकारचा खरा चेहरा आज समोर आला. अतिशय कर्तव्यदक्ष, निष्कलंक, आणि नाशिकच्या विकासाकरता तळमळीने झटणाऱ्या आयुक्तांची अचानक उचलबांगडी केली. नाशिककरांच्या सुखदुःखाशी घेणं देणं नसलेले पालकमंत्री आणि बिल्डर धार्जिणे आमदार यांच्या रेट्यामुळेच बदलीचा निर्णय घेतला, असा आरोप मनेसेने केला आहे.   महाराष्ट्र नवनिर्माण सेनेच्या सत्तेने सत्तास्थापनानंतर १८ महिने महापालिकेला आयुक्त नव्हते, नंतर डॉ. गेडामांसारखे आयुक्त लाभले. पण त्यांची तडकाफडकी बदली केल्याने मनसेच्यावतीने तीव्र निषेद व्यक्त होत आहे. आता त्यांच्या जागी पुणे महानगर परिवहन महामंडळाचे व्यवस्थापकिय संचालक अभिषेक कृष्णा यांची आयुक्तपदी नियुक्ती करण्यात आली आहे. तर डॉ. प्रवीण गेडाम यांची मुंबईत बदली करण्यात आली असून ते आता मुंबईत सहाय्यक विक्रीकर आयुक्त म्हणून रुजू होणार आहेत.   दरम्यान, गेडाम यांच्या बदलीचे राजकीय पडसाद उमटत असून आम आदमी पक्षाच्यावतीने आमरण उपोषण करण्यात येणार आहे. तर दुसरीकडे गेडाम यांच्या बदलीविरोधात सीपीएम, संभाजी ब्रिगेड यांनी मेहेर सिग्नलवर रास्ता रोको करण्याचा प्रयत्न केला.